Хив райондин Кашанхуьруьн юкьвал культурадин кIвалин гуьрчег дарамат ала. Адан кIвалахдилай гьар сад рази я. Цларал алай “Дагъустанвияр — Советрин Союздин ва Россиядин игитар”, “Хив райондин — 85 йис”, “Гъалибвилин — 75 йис”, “Лезги эстрададин гъетер” стендри, цIийиз эцигнавай тамашачийрин залди чи фикир чпел желбна.
Культурадин кIвале библиотекани кардик ква. 1988-йисалай инихъ библиотекадин заведующийвиле вичи Махачкъаладин культпросветучилище акьалтIарнавай Ашурали Апаева кIвалахзава.
Библиотекада 2000-далай виниз ктабар ава. Абур гуьрчегдаказ туькIуьрнавай кьацIарал эцигнава. Ктабар кIелзавайбурун кьадар тIимил туш.
— Хуьруьнвийриз культурадин жигьетдай къуллугъ авунин карда чна виликамаз гьазурнавай пландин бинедаллаз кIвалахзава, — лугьузва А.Апаева. — КIелзавайбурун конференцияр, гьар жуьредин гуьруьшар, лишанлу йикъар ва суварар къейдзава.
Мярекатар чна культурадин кIвалихъ, хуьруьн юкьван школадихъ галаз санал тухузва.
Хазран Кьасумов