(Эвел-23-28,30-нумрайра)
- Ва абурун патав Аллагьдин патай расул (Мугьаммад пайгъамбар Къуръан гваз) атайла, чпив гвайди (Таврат) тестикьарзавай, чпиз Ктаб атанвайбурукай (чувудрикай) (са) кIапIалди (са паюни) Аллагьдин Ктаб чпин далуйрин кьулухъ гадарна, (а Ктаб гьахъ тирди) чпиз чин тийизвай хьиз.
- Ва табий хьана абур (Аллагьдин Ктаб кьулухъ вегьей чувуд дин гвайбур) шейтIанри (ава шейтIанар джинрикай ва ава шейтIанар инсанрикай, месела, фендигар хахамар, фалчияр) Сулейманан пачагьлугъдин девирдикай (ва себебдикай) кIелзавай таб тир гафариз (шейтIанри туькIуьриз, суьгьуьрчийриз ахъайзавай таб гафариз. Сулейман пайгъамбар кьейидалай кьулухъ шейтIанри адакай тапарар туькIуьрна: бес адаз а зурба пачагьлугъ ада лугьузвай суьгьуьрдин келимайриз килигна хьайиди тир ва чаз, яни шейтIанриз, гила а суьгьуьрдин бязи келимаяр чир хьанва, ва ни абур чирайтIа ва кьиле тухвайтIа, гьадазни гьахьтин зурба пачагьлугъ жеда…). Ва Сулеймана кафирвалнач (ада суьгьуьр чирнач ва авунач, вучиз лагьайтIа, ам куфр я), амма шейтIанри кафирвал авунва, абуру инсанриз суьгьуьр чирзава. Ва (гьакIни табий хьанва чувуд дин гвайбур) кьве малаикдиз “Гьарутазни” “Марут-аз” Бабилда (Бабил — Иракда са чкадин тIвар я) авуднавай шейиниз (суьгьуьрдиз — имтигьан яз авуднавай Аллагьдин патай). Ва а кьведани чирзавачир гьич садазни та лугьудалди (кьведани): “Гьакъикъатда чун анжах фитне я — кафирвал ийимир вуна (суьгьуьр чириз)!” Ва абуру (инсанри) а кьведавай чирзавай (суьгьуьр) вичелди абуру са кас ва адан паб (гъуьлни паб) чара ийидай кар ва абурувай (суьгьуьрчийривай) садазни зарар гуз жедайди туш адалди, Аллагьдин ихтияр авачиз. Ва абуру (суьгьуьрчийри) чпиз зарар гузвай ва менфят тагузвай кар чирзава. Ва гьакъикъатда, абуруз чизвай ни ам (гьахъ, иман гана) “къачунатIа” (ни суьгьуьр хкянатIа), адаз Эхиратда (хийирдин) пай авачирди. Ва (гьакъикъатда), лап писди я а шей (суьгьуьр, куфр) вичихъ абуру чеб маса ганвай, эгер абуруз чиз хьанайтIа!
- Ва эгер абуру (чувудри) иман гъанайтIа ва (Аллагьдикай) кичIевал авунайтIа, (абуруз якъиндиз чир жедай) Аллагьдин патай тир суваб генани хийирлу тирди (абуру чпиз хкягъай кардилай), эгер абуруз чиз хьанайтIа (гьакъикъи чирвилелди — абуру иман гъидай)!
- Эй, иман гъанвайбур! Куьне лугьумир (Пайгъамбардиз): “Чи къайгъу ая (чIугу)!”. Лагь хьи: “Чаз килигиз ая!” ва яб це куьне. Амма кафирриз азиятлу азаб жеда!
- Чеб Ктаб-эгьлийрикай ва мушрикрикай тир кафирвалнавайбуруз (гьич) кIанзавач квез куь Раббидин патай хийир (вагьй, регьим, нямет, куьмек, чирвал) (авудна) ракъурна. Ва Аллагьди Вичин регьим тайинарзава (хкяна гузва) Вичиз кIанидаз; бес, Аллагь — чIехи регьимдин (зурба няметдин) Сагьиб я эхир!
- Нагагь Чна (Къуръандин са) аят “гьич авуртIа” (амал аламачирди яз малумарайтIа ва дегишарайтIа) ва я ам (Пайгъамбардив) рикIелай алудиз туртIани, Чна адалайни хъсанди ва я адаз ухшарди хкизва. Бес ваз чизвачни (эй, Пайгъамбар ва адан уьммет), гьакъикъатда, Аллагь гьар са кардал къудратлу тирди?!
- Бес ваз чизвачни (чир хьанвачни), гьакъикъатда, са Аллагьдиз талукь тирди цаварин ва чилин (вири) гьакимвал (пачагьвал, вири ихтиярар), ва авачирди квез са Аллагьдилай гъейри, я арха, я куьмекчи?!
- Я тахьайтIа, квез (эй, инсанар) куь расулдивай хабар кьаз (тIалаб ийиз) кIанзавани (гьар жуьре крар терсвализ), виликдай Мусадивай хабар кьурвал (тIалабайвал Исраилан рухвайри)? Ва ни иман куфрдихъ дегишарайтIа, ам дуьз рекьикай ягъалмиш хьанва.
- Гзафбуруз Ктаб-эгьлийрикай кIан я чпи куьн куь имандилай кьулухъ кафирриз элкъуьр хъувунайтIа — пехилвиляй абурун чанара авай, (вични) абуруз гьахъ ачух хьанвайдалай (Мугьаммад пайгъамбар гьахъ тирди чир хьанвайдалай) кьулухъ. Бес афивал ая куьне (эй, мусурманар) ва юмшагъвал ая (абуру квез авур пис крарин гьакъиндай), та Аллагьди Вичин эмир гъидалди (абурун аксина женг тухунин гьукум гудалди). Гьакъикъатда, Аллагь вири крарал къудратлу я!
- КапI кьиле твах куьне (эй, муъминар) ва закат це; ва вуч куьне куьн патал “авуна вилик авуртIа” хийирдин кIвалахрикай — квез ам (адан суваб) Аллагьдин вилик жагъида. Гьакъикъатда, Аллагьдиз куьне ийизвай амалар аквазва!
- Ва абуру (Ктаб-эгьлийри) лагьана: “Гьич гьахьдач Женнетдиз (садни) вич чувуд — дин гвайди ва я насраний (Иса пайгъамбардин рехъ тухузвайди) тирдалай гъейри (чувудри са чеб фида лугьузва Женнетдиз, ва хашпарайри са чеб жеда лугьузва). Ам абурун тапан инандирмишвилер (субутсуз хиялар) я. Лагь: “Гъваш кван куьне куь делил, эгер куьн гьахъбур ятIа!”.
- Туш (абуру тестикьарзавайвал)! Ни вичин чин (ни вич) Аллагьдиз михьиз (ихласдиз) муьтIуьгънаватIа, (вични) хъсан амал ийизвайди (дуьздиз Пайгъамбардин рекьиз табийди) яз (бес), адаз вичин суваб адан Раббидин патав жеда (Эхиратда), ва жедач абуруз кичIевал (Эхиратдин крарин гьакъиндай) ва жедач абур пашманни (дуьньядин няметар гъиляй акъатна лугьуз).
- Ва чувуд-дин гвайбуру лагьана: “Насранияр (дуьз) са кардални алач (дуьз диндал алач)”. Ва насранийри лагьана: “Чувуд-дин гвайбур (дуьз) са кардални алач (дуьз диндал алач)”, (вични) чпи Ктаб (Таврат ва Инжил) кIелзаваз! Гьа икI, (чпиз чирвилер авачиз) чин тийизвайбуруни (арабрин мушрикрини ва масабуруни) лагьана, гьабурун гафариз ухшарди. Ва (гьавиляй) Аллагьди абурун арада дуван ийида Къияматдин Юкъуз абурун арада чаравилер хьайи крара (ва гьардаз вичи авур амалдиз килигна эвез гуда).
- Ва вуж я мадни залумди, вичи Аллагьдин мискIинра Адан тIвар рикIел ва мецел гъиз тагузвайдалай ва абур (мискIинар) харапI ийиз чалишмиш хьанвайдалай гъейри! Ахьтинбур анриз анжах чпиз кичI аваз гьахьун лазим тир. Абуруз и дуьньяда агъузвал (беябурчивал) жеда ва абуруз Эхиратда чIехи азаб жеда.
- 115. Ва (са) Аллагьдиз талукь я машрикь (рагъэкъечIдай пад) ва магъриб (рагъакIидай пад) (вири чил са Аллагьдинди я). Гьинихъ куьне элкъуьрайтIани (Аллагьди квез эмир гана, гьинихъ куьне куь чинар элкъуьрайтIани — капI ийидайла), гьана (гьа пата) Аллагьдин Чин жеда (а кар Аллагьдин разивилихъ чалишмиш хьун я). Гьакъикъатда, Аллагь (Регьимдиз) Гзаф Гегьеншди, Вири Чизвайди я!
- Ва абуру (чувудри, хашпарайри, араб-мушрикри гьарда чпин жуьреда) лагьана: “Аллагьди Вичиз велед къачунва”. Пак я Ам (михьи я Ам ахьтин гафарикай)! Аксина, цаварал ва чилел вуч алатIани (вири) (са) Адаз талукь я (вири Адан махлукьар я), вири (абур са) Адаз муьтIуьгъвиле ава (вири Адан ихтиярда ава)!
(КьатI ама)
Таржума авурди – Ямин Мегьамедов,
диндин рекьяй алим
