Коронавирусдин тIугъвал гегьенш майданра чукIунин гьалара, кардик кутунвай сергьятламишдай серенжемар алудунихъ галаз алакъалу яз, Сулейман-Стальский райондин мектебдилай вилик образование гунин идарайри кIвалахдив эгечI хъувуниз гьазурвал аквазва.
Июлдин эхиримжи гьафтеда районда кардик квай аялрин вири бахчайра тамамдаказ михьи, инфекцияр терг авунин, гьакIни гьаятар аваданламишунин, къулайдаказ туькIуьрунин кIвалахар кьиле тухузва, хабар гузва райондин малуматрин агентстводи. Аялар къугъвадай майданрал алай вири тадаракар михьзава. Дараматриз гьахьзавай чкайра ва кIвалерин къене гъилер михьдай антисептикар эцигзава.
Къенин йикъан делилралди, аялрихъ галаз кIвалахзавай вири къуллугъчийри чеб азарлу ятIа чирун патал тестер вахканва. КIвалах башламиш хъувурдалай кьулухъ идарайра санитариядинни эпидемиологиядин жигьетдай ийизвай вири истемишунрал кIевидаказ амал ийида.
Ида коронавирусдин азар чукIунин вилик пад кьаз куьмек гуда. Тербиячийри ва амай вири къуллугъчийри, чарасуз яз, маскаяр ва бегьлеяр ишлемишда. Бахчадиз гьахьзавай чкадал аялар ва диде-бубаяр кIапIал тахьун патал аялар диде-бубайрин разивал аваз туькIуьрнавай графикдин бинедаллаз гъида ва хутахда.
Дараматдиз гьахьзавай вири ксарин бедендин ифин ахтармишда. Эгер аялдик хумаяр акатунин лишанар малум хьайитIа, диде-бубайриз ам кIвализ хутахун ва духтурдиз эвер гун теклифда. Ихьтин аял группадиз ахъайдач. Ихьтин, яни ОРВИ-дин лишанар квай къуллугъчийризни бахчадин къенез гьахьдай ихтияр гудач, хабар гузва агентстводи.
Идалайни гъейри, аялри гзаф вахт, тербиячийрин гуьзчивилик кваз, ачух гьавадал акъудда. Группайра тарсар тухудай вахтни а жуьреда туькIуьрда хьи, гьар жуьредин группайра авай аялриз садаз масадахъ галаз рафтарвал ийидай (гьа жергедай яз — сейрда авайлани) мумкинвал жедач. ГьакIни вири санал кIватI хьана тухудай мярекатар тешкилун ва са шумуд группадин аялар садаз кIватIун къадагъа я.
«Лезги газет»
