Дагъустандин зегьметдин ва яшайишдин рекьяй вилик финин министр Мегьамедзагьид Кихасурова республикадин «зегьметдин базарда» гьалар хъсанарунин жигьетдай кьиле физвай дегишвилерикай хабар гана. Адан гафарай малум хьайивал, 2024-йисуз Дагъустандин бейкарар кIвалахдалди таъминардай къуллугъди 18 агъзурни 600 касдиз зегьмет чIугвадай чкаяр жагъурна. И рекъем кIвалахдихъ къекъвезвай дагъустанвийрин умуми кьадардин 80 процентдиз барабар я. Гекъигун патал: 2023-йисуз 66 процентдив агакьна республикадин агьалияр кIвалахдай чкайралди таъминарнай.

М. Кихасурова гьакIни хабар гайивал, жуьреба-жуьре программайрин ва проектрин сергьятра аваз, пешекаррин игьтияж авай хилер абуралди таъминарун патал 1500 кас курсариз рекье туна. Абурукай 1239-да алай вахтунда образованидин, промышленностдин, алишверишдин, эцигунрин ва маса хилера зегьмет чIугвазва. Министрдин фикирдалди, жуьреба-жуьре кIвалахар теклифзавай мекераяр (ярмарки вакансий) тешкилунихъни метлеб ава.

«Лезги газет»