А. Абдулмуслимова къейд авурвал, республикадин мулкуна гьеле террористрин дестеяр арадал атунин хаталувал ама
28-январдиз Махачкъала шегьерда Россиядин ФСБ-дин директордин заместитель, терроризмдиз акси милли комитетдин регьбер Игорь Сироткинан регьбервилик кваз кьиле фейи заседанидал Дагъустан Республикада алатай йисуз терроризмдин вилик пад кьунихъ галаз алакъалу яз идара ийидай ва чкадин самоуправленидин органра тухвай кIвалахдин нетижаяр кьуна ва 2025-йисуз вилик акъвазнавай везифаяр тайинарна.
Дуствилин кIвале кьиле фейи мярекатда Дагъустан Республикадин Гьукуматдин Председатель Абдулмуслим Абдулмуслимова, федеральный ведомствойрин, республикадин гьукумдин идара ийидай органрин регьберри, муниципалитетрин тешкилатрин кьилери, РД-дин терроризмдиз акси комитетдин аппаратдин ва терроризмдиз акси комиссиядин идарадин векилри иштиракна.
Совещанидив эгечIдалди иштиракчияр Дагъустандин халкьарин культурадиз ва адетриз талукьарнавай выставкайриз, милли парталриз, куьгьне шикилриз килигна. Мугьманриз республикада гьазурнавай терроризмдиз акси контентни къалурна. Выставкада дяведин махсус серенжемда иштиракзавай дагъустанвийрикай тир Россиядин Игитрикай кхьенвай ктабарни авай.
Игорь Сироткина кIватI хьанвайбур тебрикна ва вичин рахунра терроризмдин къурхулувал артух жезвай шартIара республикада тухузвай кIвалахдикай лагьана. Арадал атанвай гьалари гьукумдин органрин вилик региондин ва муниципалитетрин дережада тешкилзавай кIвалахдин ери мадни хъсанарунин кьетIи везифаяр эцигзава. Агьалийрихъ, иллаки жегьилрихъ галаз умуми профилактикадин ва кьилдин таблигъатдин кIвалах тухун герек къвезва. Абурун кьатIунра терроризмдин идеологиядиз, неонацизмдин идеяйриз аксивал къалурдай фикирар арадал гъана кIанзава. Къецепата авай террористрин международный тешкилатрин ва коллективный западдин чIуру таблигъатдин таъсирдик акат тийидайвал.
Терроризмдин вилик пад кьунихъ, муниципалитетрин дережада терроризмдин идеологиядиз акси серенжемар тухунихъ галаз алакъалу яз кьабулзавай серенжемрикай ва умуми кIвалах сад авуникай Дагъустан Республикадин Гьукуматдин Председателдин заместитель Рамазан Жафарова, РД-дин милли сиясатдин ва динрин крарин рекьяй министр Энрик Муслимова суьгьбетна.
Региондин агьалийрин къанажагъда терроризмдиз акси фикирар арадал гъун патал тешкилзавай жегьилрин форумрикай ва маса мярекатрикай Россиядин жегьилрин тешкилатдин регьбердин заместитель Денис Аширова, Россиядин просвещенидин министерстводин аялрин ихтиярар хуьдай государстводин сиясатдин департаментдин директор Лариса Фальковскаяди ва Россиядин спортдин министерстводин физический культурадин департаментдин векил Айрат Сагдиева лагьана.
Совещание кьиле фидайла Абдулмуслим Абдулмуслимова къейдна хьи, чкадин самоуправленидин органри гьукумдин идара ийидай, къайдаяр хуьдай органрихъ, общественный ва диндин организацийрихъ галаз санал терроризмдин идеологиядин вилик пад кьуниз талукь кIвалах тухузва. Тарифдай делилар аватIани, республикадин мулкуна гьеле террористрин цIийи дестеяр арадал къвезва. Динэгьлийрин арада экстремистрин фикиррал алай кIватIалар пайда жезва. И кар фикирда кьуна, терроризмдиз акси яз тухузвай кIвалахдин ери мадни хкажун ва алава мярекатар тухун лазим я.
Абдулмуслим Абдулмуслимова Игорь Сироткиназ ва терроризмдиз акси милли комитетдин къуллугъчийриз республикадиз методикадин рекьяй куьмек гунай сагърай лагьана.
Мярекатдал рахай маса юлдашри чпин кIвалахдин тежрибадикай, уьлкведа ва гьакI регионда авай гьаларикай ихтилатна.
Нетижаяр кьунихъ галаз сад хьиз, Дагъустан Республикада гьукумдин идара ийидай ва чкадин самоуправленидин органрин, терроризмдиз акси комиссийрин кIвалахдин менфятлувал хкажуниз талукьарнавай серенжемарни тайинарна.
Совещанидин кIвалахдикай гегьешдиз Дагъустандин Гьукуматдин сайтдай кIелиз жеда.
Абад Азадов
