РД-дин Кьилин ва Гьукуматдин Администрациядин Кьил Махач Омарова Сергей Меликован тапшуругъдалди Халкьдин Собранидин ва республикадин жуьреба-жуьре министерствойринни ведомствойрин векилрихъ галаз чкадин самоуправленидин органрин кIвалахдин менфятлувал артухарунин, муниципалитетриз талукь реформа кьилиз акъудунин месэлаяр веревирдна.
Уьлкведин са жерге регионра муниципалитетрин гьукумдин къурулушдик бязи дегишвилер кухтунва. И серенжемди агьалийрин дердийриз, энгел тавуна, килигдай, абурун яшайишдин шартIар хъсанардай мумкинвилер гузва.
Чкадин самоуправленидин органрин къурулуш хъсанаруниз талукь яз Дагъустандин Кьилин патав экспертрикай ибарат кьилдин совет арадал гъидайвал я. Аник илимдин, Агъсакъалрин советдин, интеллигенциядин векилар ва масабур акатда. Советдин членри шегьерринни районрин администрацийрин активрихъ галаз гуьруьшар тешкилда ва муниципалитетриз талукь реформадин пис-хъсан терефар веревирдда. Идалай гъейри, советдин членри муниципалитетриз талукь яз кьиле тухудай дегишвилерин патахъай чкадин агьалийрин фикирарни чирдайвал я.
РикIел хкин, муниципалитетриз талукь реформа кьилиз акъудайтIа, республикадин муниципальный районрин чкадал округар арадал къведа. Уьлкведин са кьадар регионра и месэладиз талукь кIвалах кьиле тухванва. Реформадикай гегьеншдиз РД-дин Кьилин сайтдай кIелиз жеда.
Агьмед Магьмудов
