Алай девирда инсанрин, иллаки хсуси къанажагъ бегьем битмиш тахьанвай жаванрин, жегьилрин мефтIер чпиз кIани терефдихъ элкъуьрун патал кьиле физвай таблигъатдин, идеологиядин дяве лап хаталуди я. Вучиз лагьайтIа, терроризмдин, экстремизмдин, ягъиз-кьиникьин, чеб гьахълу рекье авайбур яз къалурунин, государстводин законар чпиз талукь туширбур яз кьунин идеологиядин вирусар бедендик акатайбур дуьз рекьел хкун, абур зулумдин микробрикай азад авун четин акъваззава. Терроризм, пайдах хьиз, цава кьунвайбурун таъсирдик акатайбуру чпизни, хизанризни, обществодизни еке зиян гузва.
Акьалтзавай несил ихьтин хумадикай, зулумдикай хуьн патал эхиримжи йисара республикада гзаф крар ийизва. Гьа гьисабдай яз, — Мегьарамдхуьруьн райондани. Ина терроризмдиз акси комиссия кардик кваз ва ада бегьерлудаказ кIвалахиз са шумуд йис я. АТК-дин председатель Фарид Агьмедова и кар алай месэла вичин гьар йикъан гуьзчивиликай хкудзавач. Терроризмдин, экстремизмдин идеологиядиз акси таблигъат тухудай рекьер тайинарнава ва къайдаяр хуьдай органрин, гьукумдин маса идарайрин работникрин, диндин, общественностдин векилрин куьмекни галаз жуьреба-жуьре серенжемар тешкилзава. Районда “Жегьилар террордиз акси я” лишандик кваз митинг, “Чун терроризмдиз, экстремиздиз акси я” темадай элкъвей стол гзафбурун иштираквал аваз кьиле фена.
Вахт-вахтунда АТК-дин заседанияр тухузва. Ана райондин талукь вири идарайрин къуллугъчийри, дяведин ва зегьметдин ветеранри, динэгьлийри, жегьилрин ва общественный маса организацийрин векилри иштиракзава. Мисал яз, эхиримжи заседанидал, жегьилар чIуру ва хаталу таъсирдик акат тавун патал тухвана кIанзавай умуми кIвалахдикай “Мегьарамдхуьруьн район” МР-дин кьил Фарид Агьмедова, Россиядин ФСБ-дин пограничникрин Дагъустанда авай управленидин начальникдин заместитель Сергей Русака, МВД-дин райондин отделдин начальникдин везифаяр тамамарзавай Вадим Мевлуьдинова, адан заместитель Суфьян Селимова, райондин прокурордин заместитель Сулейман Сейфуллаева чпин фикирар лагьана.
Районда датIана сиясатдин, культурадин, спортдин мярекатар, жуьреба-жуьре суварар тешкиллудаказ, гурлудаказ тешкилзава. Абур кьиле физвай чкайра агьалийрин хатасузвал хуьн патал къайдаяр хуьдай органри тухузвай кIвалах къейд авуниз лайихлу я. Район Россиядинни Азербайжандин сергьятдал ала. Сергьятдилай ихтиярсуз элячIзавай инсанарни кими жезвач. Абурук тахсиркарарни, террористарни, гьукумдин сиясатдиз акси маса инсанарни акатзава. Абур районда ва республикада чпин хаталу кIвалах тухудай шартIарикай магьрумдай серенжемарни вахтунда кьабулзава.
АТК-дин комиссияди динэгьлийрихъ галаз санал тухузвай кIвалахдини хъсан нетижаяр арадал гъизва.
Нариман Ибрагьимов
