И йикъара Сулейман-Стальский райондин кьил Нариман Абдулмуталибова дигидай цин Саидхуьр-Алидхуьр къанал ремонтунин ва адан къерех тирвал фенвай рехъ гегьеншарунин кIвалахар кьиле физвай гьал ахтармишна. Идакай «Лезги газетдиз» райондин администрациядин пресс-къуллугъди хабар гана.

Гила кьве хуьруьн жемятдизни куьруь рекьяй улакьра аваз фидай мумкинвал жеда. Кьве километрдилай гзаф яргъивал алай, хуьруьн майишатдин Саидхуьр-Алидхуьр дигидай къаналди Алидхуьруьн ва «Тахта» микрорайондин агьалийрин хсуси майишатар дигидай целди таъминарзава. Санлай къачурла, целди таъминарзавай чилин майдан 500 гектардив агакьнава.

Къейдзавайвал, тIвар кьунвай къанал эхиримжи 8 йисан къене ремонтнавач. Гьавиляй ада, ятар алахьна, къваларив гвай участокриз, кIвалериз зарар гунни мумкин тир. Исятда къанал михьунин кIвалахар тамамарзава. Къерех тирвал фенвай рекьиз гележегда чиргъ вегьедайвал я.  КIвалахар райондин ва Кьасумхуьруьн администрациядин такьатрихъ ийизва.

«Лезги газет»