Жуван макъалада, гьуьрметлу редакция ва кIелчияр,  заз гъве­чIи­ди ятIа­ни, тIал алай месэладикай лугьуз кIан-зава. Ихтилат почтовый ящикдикай (кьва­тидикай) ва газетар, журналар, ча­рар ва маса корреспонденцияр адресатрив гьикI ахгакьзаватIа, гьадакай физва.

РикIел хкин: чи республикадин шегьерра ва районра почтовый ящикар эхиримжи йисара эсиллагь кьит хьанвайдакай за гьеле “Лезги газетда” кхьейди я. Амма хъсан патахъ са дегишвални гьелелиг хьанвач, месэла къени гьял тавуна ама.

Дербентдин хозмагра ва ба­зарра гьикьван къе­къве­натIани, ­нивай хабар кьунатIани, заз са­най­ни почтовый ящик жагъанач. Виридакай рахадач — почтовый ящикдихъ вичи гьар йисуз “Лезги газет” кхьизвай зи къунши, гьуьрметлу дух­тур Абдул­гьа­­лимов Абдулгьалиман къекъуьнарни нетижасузбур хьана.

Дербентдай гьат тавурла, за Каспийскда яшамиш жезвай зи дустуниз зенг яна ва анин хозмагра почтовый ящикар аватIа хабар ­кьуна. Тажубдин кар я — гьанайни гьатнач…

Месэладин хцивал анал ала хьи, шегьеррин чкайра (хуьрера заз чидач) кIвалерин (иллаки хсуси кIвалерин микрорайонра) варарал почтовый ­ящикар тахьуниз килигна, газетар ва чарар варарин кьа­цIарик кутаз, гагь-гагь варарин виликни эцигиз хъфизва. Гзаф вахтара абур квахьзава. Иниз килигна газетар ва журналар кхьизвайбурун кьадарни йисалай-суз тIи­мил жезва­.

2018-йис патал газетар кхьинихъ галаз алакъалу яз цIи са татугайвал мадни хьана. Абур кхьинин вахт (1-сентябрдилай) алукьна са варзни зур алатайлани, республикадин ва чкайрин газетрин къиметар (“Лезги газетдинни”) малумарнавачир. Себеб? “Дагпечатди” каталогар вахтунда гьазур тавун. Су­ал къвезва — бес им республикадин газетарни журналар кхьиниз  кьецI гун тушни?

Нариман Къарибов