2017-йис тарихда гьатзава. Халкьдин къуллугъда авай тешкилатар чпелай алакьай ва кьилиз акъудна акьалтIариз тахьай крар сад-садахъ ийиз къайгъуйрик ква, кIвалахрин нетижаяр кьазва…
Махсус программаяр ва проектар кардик кутуна, кIвалахар тешкилуналди Сулейман-Стальский райондин администрацияди АПК, спорт, здравоохранение, образование, эцигунарни ремонтдин кIвалахар вилик тухунин жигьетдай аквадай хьтин нетижаяр арадал гъанва. Абурукай хабарар ганва, абурал акъвазунин лазимвал авач. Амма бязи чкайрал кьиле физвай ремонтрикай талгьанани жедач. ИкI, Кьасумхуьруьн 17 вилин муькъуьн агъа кьиле, ЦIийихуьруьхъди тухванвай гегьенш тротуардин чапла пата ракьарикай хатасузвилин жугъун ягъунин кIвалахар кьиле тухузва. Машинрин еке гьерекат авай чка хьуниз килигна, анаг махсус жугъундалди кIеви авун лап хъсан кар я.
Чаз малум хьайивал, анал кIвалахзавай устIарринни рабочийрин бригада (М.Гьасанов, С.Мутагьиров, А.Мутаев, К.Хасбулатов, М.Абсалаков) Буйнакскдай я. Абуру, яргъал тевгьена, чпин кIвалахар, санлай 2 км 400 метр мензилдиз ракьун жугъунар яна саки акьалтIарзава. Рекьерин устIар (мастер) Маккараф Бийбулатован гафарай мадни чир хьайивал, чи патара и бригадади кIвалахзавайди сад лагьай сефер туш. Икьван чIавалди абурун дестеди Дербент пата санлай 7 км мензил авай ракьун жугъунар туькIуьрна. Идалайни гъейри, мукьвал вахтара Кьасумхуьр-Кьурагь рекьин хаталу чкайрални (саки 12 км-да) и жуьредин кIвалахар кьилиз акъудун планрик ква.
Райсудин Набиев