Квез и шикилдай аквазвайбур Бут-Къазмайрал яшамиш жезвай гьуьрметлу агъсакъал Музафар Гьасанов ва адан уьмуьрдин юлдаш Муьгьуьжат я. Яшар 80-йисалай алатнавай, яргъал йисара школайрихъ галаз алакъада хьайи абуруз мукьвара Бут-Къазмайрин юкьван школадин директордин куьмекчи Камале Гьасанова, соцпедагог Марьяна Мегьамедова, ст. вожатый Инжи Рагьимова, 11-классда кIелзавай аялар мугьман хьана.
Жузун-качузун, суьгьбетар авурдалай кьулухъ аялри яшлубуруз ва муаллимриз туькIуьрнавай шиирар кIелна. Гьасановри чпин уьмуьрдикай ихтилатарна, жегьилриз, иллаки школада кIелзавайбуруз камаллу насигьатар гана.
— Дербентдин педучилище акьалтIарнамазди кьисметди зун Тагьирхуьруьн школадиз акъудна, — суьгьбетзава агъсакъалди. — Ина гъвечIи классра авай аялриз тарсар гуз башламишна. КIвалахни ийиз, за гилан ДГПУ-да филологиядин рекьяй кьилин образование къачуна.
Гуьгъуьнлай Хив райондин Цналрин, Мегьарамдхуьруьн райондин Хъартас-Къазмайрин, Оружбайрин, Бут-Къазмайрин юкьван школайра директорвал авуна. ЦIийи хуьруьн школада муаллимвиле ва директордин куьмекчивиле кIвалахна. Исятда, балаяр, куьне кIелзавай школадин дараматрин проектар туькIуьризни зун чалишмиш хьайиди я. Жемятди рейсадвилелди сес гуналди зун хуьруьн кавхавилизни хкяна. Жувалай алакьдайвал, жемятдин яшайишдин шартIар хъсанариз алахъна.
Санлай къачурла, за 60 йисуз школайра муаллимвиле, уьмуьрдин юлдаш Муьгьуьжата 38 йисуз школадин библиотекарвиле кIвалахна. Чна чи хизан кIвачел акьалдарна, аялриз тербия гана ва гьар сад са пешедин иеси авуна. Исятда абур чпин хизанар кутуна шегьерра яшамиш жезва. Веледар, хтулар чал кьил чIугваз мукьвал-мукьвал хквезва, дерди-гьалдикай хабар кьазва, — разивалзава агъсакьалди.
— Жува тарс-тербия гайи, жуван вилик чIехи хьайи аялризни за жуван веледриз хьиз, бубавал авуна лугьуз жеда. Къе абуру чаз гьуьрметзава, гьар са сувар мубаракзава, мугьманвилиз къвезва. Сагърай чеб.
Фенвай уьмуьрдилай чна разивалзава. Жедай хатур-гьуьрмет ийиз яшамиш жезвай чун къе халкьдин, хизандин, веледрин ва хсуси намусдин вилик уьзягъни я. Исятда чна Аллагьдивай тIалабзавайди вири инсанрин арада ислягьвал, гьуьрмет ва берекат хьун я, — алава хъувуна Музафар Гьасанова.
Желил Желилов
