Палчух авачир алахьай йикъара, заз къунши хуьруьз кIвачи-кIвачи фин хуш я.ГьикI лагьайтIа, нянрихъ авур веревирдер, пакамахъ рекье фидайла, рикIел хкана, тупIалай хъувуна, къайдадик кутаз жезва. Идалайни гъейри, мензилдин са уламдилай захъ кIвалахдин юлдаш лезги Р. агалтзава. Ам дидед чIалал фасагьатдаказ рахада.Хъуьтуьл зарафатар ийида. РикIени мецел са ихтилат аваз рахада и кас. Гьавиляй чи арайри яргъалди дурум гузва…
«Лезги газетдиз» Казим Казимован ачух кагъаз, адазни жавабар акъатнавай вахт тир. Зани жуван фикир-писателдиз гуьгьуьл хуьдай тебрик кхьин, рекьин юлдашдиз лугьуда.
— Яда, ваз аквазвачни? Казиман дустар, тебрикар гузвайбур машгьур шаирар, художникар, генералар, духтурар я. Вун — са шабагьни авачир жергедин муалллим. Вуна вун ракьарин арада авай рипинай гьисабзаваз тахьуй гьа? Къвалав гвай дуст чин тийизвай ваз гафарин устIар бажагьат чизва. КхьизватIа кхьихь. Вун патал ада гьич спелдин хелни юзурдач, я газетдани чапдач.
Захъ мад гаф амукьнач, фикирдик квай кар кьулухъ яна.
Р.-дин » Вун патал ада гьич спелдин хелни юзурдач…»гафар К.Казимоваз ерли хас туширди писателди «ЛГ-да» кIвалахдайла субут хьана. Мухбиррин чарарин гьахъ -гьисаб ийидайла, хъсанбурун арада аваз зи ва жергедин маса инсанрин тIварарни кьуна, чак руьгь кутуна. «Казим муалллим вири халкьдин писатель я. Ада инсанрин арада тафават твазвач. Жемят агудзава”.
Казим халу, вун хьтин, руьгьдиз къуватлу лезги къужаяр виш йисара яшамиш ва чахъ мадни хьурай!
Гьасан Гьуьсейнов, Белиж
