4-ноябрдиз культурадинни образованидин Вирироссиядин “Искусстводин йиф” серенжемдик чи республикадин культурадин идараярни экечIна. Музейра, библиотекайра, театрра зарийрихъ, актёррихъ, художникрихъ галаз гуьруьшар хьана, мастер-классар кьиле фена. Мярекатра РД-дин культурадин министрдин везифаяр вахтуналди тамамарзавай Зарема Бутаевадини иштиракна. Йикъан сятдин кьудалай башламишай мярекатар йифен кьуларалди давам хьана.
М.Горькийдин тIварунихъ галай Урусрин драмтеатрда тамашачийри рикI аладарунин интерактивный программайра иштиракна, абур выставкайризни килигна, актёрвилин устадвиляй мастер-классрихъ яб акална, къумадин анимацийрин шоу, Урусрин театрдин артистри ва операдинни балетдин театрдин оркестрди тамамарай мани-макьамарни бегенмиш хьана. Ктабрин “Арбат” туьквенди гьа ина викторинаяр тешкилна, литературадин жавагьирар кIелунал рикI алайбурун арада тафаватлубуруз призар гана.
Тахо-Годидин тIварунихъ галай Милли музейди ва Дагъустандин госфилармонияди тамашачияр патал “Остров сокровищ” тIвар алай махсус программа тешкилнавай. Ина кьиле фейи мярекатар лап итижлубур хьана, музейдиз авур сейрди лагьайтIа, тамашачияр дегь девиррин вакъиайрин иштиракчияр авуна.
Этнографиядин “Дагъустандин хуьр” музейда Дагъустандин вири халкьарин чIаларал манийрин, милли авазрин сесер гьатнавай. Абур ДГУ-дин культурадин факультетдин актёрвилин отделенидин ва Барият Мурадовадин тIварунихъ галай культурадинни искусстводин колледждин студентри тамамарзавай. Гележегдин актёрри милли парталарни алукIна, милли чIаларал куьруь тамашаярни къалурна. Гуьгъуьнлай сегьне Дагъустандин халкьарин музалатрин госоркестрдин ихтиярда гьатна. Абурун вини дережадин пешекарвили ингье 80 йисан вахтунда халкьдин музыкадин культура хуьзва. Са жерге выставкайрилай гъейри ашкъи авайбур патал ина живописдай, гам-халича хрунай мастер-классарни кардик квай.
Шииратдин театрда Дербентдин музучилищеди Александр Бестужев-Марлинскийдин эсеррай манийринни шииррин композиция туькIуьрнавай. Мярекатдин музыкадин пай Башир Багьавдинова (агъач-кумуз) ва Арсен Тлехурайя (гитара) ачухна. Ина абуру къецепатан уьлквейрин ва чи композиторрин жавагьиррин эсерар яна. Театрда “Просмотр” выставка ва живописдай мастер-классни кардик квай.
РД-дин Милли библиотекада “Эстетика. Художественные вечера” проект тешкилнавай. Суьгьбет художникар тир Александр Кожуховакай ва Казимир Малеевичакай тир. Буйнакс шегьердин бажарагълу аялрин центради “Чи девирдин игит” проектдин презентация авунвай. Музыкадин “Искусстводи садзава” программадилай гъейри библиотекадани мастер-классар тухвана.
Дербентдин культурадин идарайрини “Искусстводин йиф” серенжемра иштиракна. “Дербентда I Пётрдин кIвал” музейдин комплексда яратмишунрин мастерской ачухнавай. Аялри художникрин регьбервилик кваз Россиядин халкьарин милли парталрин шикилар чIугвазвай. Мастер-классда гьар са халкьдиз, ам яшамиш жезвай чкадиз, абурун милли парталрин кьетIенвилиз талукь суьгьбетарни ийизвай.
“Женгинин баркаллувилин” музейда анин илимдин къуллугъчи Тамерлан Камилова “Зи Ватан — Россия” мярекат тешкилна. Ада инкъилабдин лишанрикай, вакъиайрикай, инкъилабди агьалийриз, гележегда уьлкведин медениятди уьмуьрдиз авур таъсирдикай суьгьбетна. 1917-йисуз кьиле фейи вакъиайрикай документрал бинеламиш хьана туькIуьрнавай фильмни къалурна.
“Прикаспийдин тIебиат” музейда тамашачийриз “Музей ва экология” программа къалурна. Ина суьгьбетар чи дагъларинни багъларин гуьзелвиликай, такабурлувиликай тир ва “Чи дагълар — чи дамах” шикилрин выставкани ачухнавай.
Дуьньядин медениятрин ва динрин тарихдин музейда интерактивный шикилрин “Сакральный атрибут” проект къалурна, машгьур режиссёр, сценарист ва продюсер, РФ-дин халкьдин артист Павел Лунгинахъ галаз гуьруьш, дизайндин RD школадин мастер-класс кьиле фена.
Зарема Бутаевади къейд авурвал, цIинин йисуз “Искусстводин йиф” серенжем “Искусстводи садзава” лишандик кваз кьиле фена.
Дагъви Шериф
