Мукьвара РД-дин Гьукуматдин Председателдин заместитель Нариман Абдулмуталибов СтIал Сулейманан райондин образованидин са жерге объектра цIийикIа туькIуьр хъувунин кIвалахар кьиле физвай гьалдихъ галаз таниш хьана. Идакай «Лезги газетдиз» райадминистрациядин пресс-къуллугъди хабар гана.
Кьилди къачуртIа, райондин кьил Саид Темирхановахъ ва администрациядин жавабдар пешекаррихъ галаз санал ам Агъа СтIалрин ва ЦIийихуьруьн мектебриз фена. Къейд ийин хьи, и мектебра ремонтдин кIвалахар РФ-дин государстводин «Развитие образования» программадин сергьятра аваз республикада кьабулнавай «Модернизация школьных систем образования» проектдин куьмекдалди кьилиз акъудзава.
Нариман Абдулмуталибова жавабдар пешекарривай, пудратчи карханайрин векилривай кIвалахар кьиле физвай гьалдикай хабар кьуна. Малум хьайивал, ЦIийихуьруьн мектебда вири крар планда къалурнавай вахтунда кьилиз акъудиз алакьзава. Агъа СтIалрин мектебдикай рахайтIа, ина энгел тавуна гьялна кIанзавай бязи кимивилер винел акъатна.
Республикадин вице-премьерди эцигунрин кIвалахриз хъсандиз гьазурвал такунвайди ва хейлин месэлаяр гьял тавуна амукьзавайди къейдна. Ада райондин администрациядин талукь идарайрин пешекарриз пудратчи карханадин векилрихъ галаз санал винел акъатнавай кимивилер арадай акъудун патал серенжемар кьабулун, вири кIвалахар пландин бинедаллаз тешкилун, гуьзчивал тухудай жавабдар кас тайинарун тапшурмишна.
Къейд ийин хьи, СтIал Сулейманан районда авай чIавуз Нариман Абдулмуталибов Украинада кьиле физвай махсус серенжемдин са жерге иштиракчийрин кIвалериз мугьман хьана, аялриз 1-июндиз къейдзавай сувар мубаракна, абуруз савкьатар гана. Идалай гъейри, ада райадминистрацияда яшайишдинни экономикадин рекьяй район вилик тухунин месэлайриз талукьарнавай совещанини кьиле тухвана.
Агьмед Магьмудов
