6-июндиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз республикада агьалияр кIвалахдал таъминарунин, бейкарвилин вилик пад кьунин месэлайриз талукьарнавай совещание кьиле фена.
Дагъустандин премьер-министрди къейд авурвал, алай вахтунда виридалайни гзаф инсанри кIвалахзавай экономикадин хилерик хуьруьн майишат, карчивал ва промышленность акатзава. Гьа са вахтунда ада республикадин са жерге районра зегьмет чIугваз алакьзавай хейлин инсанар кIвалахдалди таъминар тавунвайдакайни лагьана.
«22 муниципалитетда зегьмет чIугваз жезвай агьалийрин 50 процент кIвалахдик квач. Ихьтин гьалари яшайишдин и хиле кьетIи серенжемар кьабулна кIанзавайди къалурзава. Гьелелиг чна инсанрин зегьметдин ва акьулдин мумкинвилерикай тамамдиз менфят къачузвач: кIвалахдай чкайрин кьадар тIимил я. Нетижада чпин ихтияррикай хъсандиз хабар авачир гзаф кьадар агьалияр зегьметчийрив лайихлудаказ эгечI тийизвай, абурун зегьметдиз кутугай къимет тагузвай кьилдин ксарин гъилик кIвалахуниз мажбур жезва.
Лагьана кIанда, дагъустанвияр халис зегьметкешар я. Заз талукь идарайрин векилривай агьалияр кIвалахдалди таъминарун патал зегьметдин гьихьтин ресурсрикай менфят къачузватIа чир хьана кIанзава. Конституцияди абуруз зегьметдин гьакъиндай ганвай ихтиярар кьилиз акъудун патал чна вуч авун герек я?» — лагьана А.Абдулмуслимова совещанидин иштиракчийрихъ элкъвена.
Ада гьакIни районринни шегьеррин кьилеривай гьакъикъатдихъ галаз кьан тийизвай кьуру рекъемар гьазурунал эхир эцигун тIалабна.
«КIвалахзавайбурун кьадардал гьалтайла, муниципалитетрин гьахъ-гьисабра авай рекъемар Дагестанстатдин рекъемрихъ галаз кьазвач. Ихьтин шартIара гьалар пайгардик кутун патал кьил-кьилел алай серенжемар кьабулиз четин жезва.
Заз кьуру рекъемар герек туш, заз цIийи рекьер, ФАП-ар, хуьрера хъсандиз туькIуьрнавай духтурханаяр герек я. Квелди Кьурагь районда яшамиш жезвай агьали Махачкъалада, Р.Гьамзатован тIварцIихъ галай проспектда, яшамиш жезвай агьалидилай усал я? Зун паталди абур кьведни сад я. Статистикадин рекъемар гьакъикъатдихъ галаз кьазвайбур хьана кIанда. И жигьетдай зегьметдин ва яшайишдин рекьяй вилик финин министерстводин вилик чIехи кIвалах акъвазнава», — лагьана премьер-министрди тIвар кьунвай министерстводин кьил Мурад Къазиевахъ элкъвена.
Совещанидин кIвалахдикай гегьеншдиз РД-дин Гьукуматдин официальный сайтдай кIелиз жеда.
Чи мухбир
