Чи районда карчияр гзаф аватIани, набут аялриз куьмекар гуз гьазурбурун кьадар тIимил я. Реабилитациядин центрада набут аялрин арада кьиле тухузвай йисан вири мярекатра, аялрин къайгъударвилин лишан яз мердвилелди садакьа — пишкеш гузва.
Ахьтинбурукай сад ахцегьви карчи (ада 2013-2014-йисара райадминистрациядин жегьилрин парламентдин председателдин везифаяр тамамарна) Зейнидин Абилов я. Алай вахтунда ам аялрин халис дуст ва куьмекчи хьанва. З.Абилова аялар патал датIана ийизвай мергьяматлувилин кIвалах тариф авуниз лайихлу я. Аялризни ам гьакьван гзаф кIанда. Абурун гуьгьуьлар шадарун патал ада кьве сеферда хсуси харжийралди къугъунрин аттракцион гъана. Баркалла ва аферин!
Шариатдин гьадисра лагьанвайвал, гьар са садакьадай цIуд сеферда артух эвез хгуда. Эгер са касди азарлудал кьил чIугуртIа, ам шадарайтIа ва пишкешдалди аялдин гуьгьуьл къачуртIа, а касдиз еке сувабар жеда, адан девлетдик мадни берекат кутада ва ам хата-баладикай хуьда.
Реабилитациядин центрадин кьиле авай ксари, ина кIвалахзавай къуллугъчийри, гьакIни аялрини абурун диде-бубайри Зейнидин Абиловаз набут аялрин къайгъу чIугунай рикIин сидкьидай чухсагъул лугьузва. Чаз адахъ чандин сагъвал, яргъи ва хушбахт уьмуьр хьана кIанзава. Къуй чи арайра З.Абилов хьтин мергьяматлу, мерд инсанар гзаф хьурай.
Рагьидин ЭМИНОВ
