И йикъара чун Каспийск шегьерда яшамиш жезвай Айшат Рамазановадихъ галаз гуьруьшмиш хьана. Чилел зегьмет чIугунал рикI алай тежрибалу багъманчи тир лезги дишегьлиди вичин дачадин участокда арадал гъанвай гуьзел багъдикай ва пешедин сирерикай суьгьбетна.
- Квевай цайи кьван цуькверин ва тарарин кьадар лугьуз жедани?
— Муракаб суал я. Гьар йисуз за 30-далай тIимил тушиз цIийи набататар цазва. Бязибур экъечIзава, бязибур, гьайиф хьи, — ваъ. Санлай къачурла, за цайи набататрин кьадар 1000-далай тIимил туш лагьайтIани жеда. Иник къизилгуьлерни, гзаф кьадар маса жуьре цуькверни (лилияр, крокусар, нарциссар…) акатзава.
- Куьне “къаюмвалзавай” набататрин арада иллаки рикI алайбур авани?
— Заз вири кIанда! Амма къизилгуьлер — кьетIендиз. Абур захъ 150 жуьре ава.
- Куь машгъулат квелай башламиш хьанатIа лугьудани?
— 2006-йис. А чIавуз чун хизанни галаз вахтуналди дачадиз куьч хьанай. Амма уьмуьрдин вакъиаяр акI кьиле фена хьи, чун ина фикирда авайдалай са кьадар геждалди амукьдайвал хьана. Са кьадар лагьайла къейд ийин, чун гилани гьа ина яшамиш жез ама. Сифтени-сифте за цана арадал гъайи набатат сирендин тар тир. Гзаф гелкъуьн герек тушир ада гьикьван гуьрчегдиз цуьк акъуднай! Жуван зегьметдин нетижа акур зун набататриз авайдалай гзаф фикир гудай, вахт серфдай ва жуван хсуси багъ арадал гъидай фикирдал атанай.
- Чаз аквазвайвал, и кардик куьн тамамдаказ экечIна. ХъуьтIуьн вахтунда квел машгъул я?
— Вири гьавадин шартIарилай аслу я. Сифтедай за багъда авай набататар кIевирзава. Идаз тахминан декабрдин эхирдалди вахт герек жезва.
Январдиз тумарин селекцияда арадал гъанвай цIийивилер ахтармишзава. Багъманчивилин алатрикай маса вахчуна кIанзавай шейэрикай фикирзава. Тумар цунин цIийи къайдайрихъ галаз таниш жезва. И кар гзаф итижлуди ва зегьмет истемишзавайди я.
- Хсуси тежрибадикай менфят къачуна, жегьил багъманчийриз гьихьтин меслятар гуз жеда?
— Кьакьандиз экъечIдай набататар — багъдин юкьва, аскIандиз экъечIдайбур къерехрай цана кIанда. Кьилинди гъиле авай кардал рикI хьун я. Куьне серф авур кьван зегьметрин нетижа багъди квез артухни алаз арадал хкида.
- Сагърай!
Саида Мусаева,
Зарифа Шабанова,
ДГУ-дин филологиядин факультетдин
ОЖ-дин 3-курсунин студентар
