Алукьнавай гад чимиди хьанва. Гзаф йикъара гьавадин чимивал 25-30 градусдилай алатзава. Ида тамун чкайра цIаяр кьунин хаталувал арадал гъизва. И кар себеб яз Дагъустан Республикадин тамарин майишатдин Комитетди 2021-йисан 1-апрелдилай Дагъустандин тамарин фондунин мулкунал цIаяр кьунин хаталувилин сезон тайинарнава. Кьасумхуьруьн ва Кьурагьрин лесничествояр акатзавай “Касумкентское лесничество” ГКУ-дихъ 16 000 гектардилай виниз тамар ава. Анин работникри тамар цIаяр кьуникай хуьн патал вуч кIвалахар тухванва, гьихьтин серенжемар кьабулзава?
И ва маса суалриз жавабар жагъурунин мураддалди чун “Касумкентское лесничество” ГКУ-дин директор Лазир Фармановахъ ва РД-дин “Дагестанский лесопожарный центр” ГАУ-дин районрин уртах отделдин начальник Къадир Межидовахъ галаз гуьруьшмиш хьана.
— Гьелбетда, тамари цIаяр кьуни неинки набататрин, гьакIни гьайванрин алемдизни еке зиянар гузва, — лугьузва Л. Фарманова. — Ихьтин чIуру нетижайри тарар, къушар, гьайванар кунал, накьвадин винел пад терг авунал гъизва. И кар фикирда кьуналди, алай вахтунда кардик квай федеральный закондин бинедаллаз, цIаяр кьунин хаталувилин сезондин вахтунда тамун чкайра цIай квай спичкадин кьалар ва пIапIрусдин кьатIар гадарун, тамуз фейила, ягъ ва я бензин кужумнавай шейэр тун, гъуьрчез фейила, фад цIай кьадай затIар ишлемишун, путулкаяр ва ханвай гуьзгуьдин кIусар тама тун, тарарин кIаник квай векьиз, ачух майданриз, чиле авай векьериз-кьалариз цIай ягъун, куьтягь тахьанвай цIай гуьзчивал алачиз тун къадагъа авунва.
Лазир Фарманова алава хъувурвал, карханадин работникри тамара цIаяр кьунин дуьшуьшар тахьун патал тайин кIвалах тухузва. ИкI, там квай чкайриз фидай рекьер ремонтна, къайдадиз гъанва, пешекарри, чкайрал физ, хуьрерин агьалийрихъ галаз гъавурда тунин кIвалах тухузва. Тамарин мукьув цIай татун патал тарарин къерехар тирвал санлай 69 километрда цанар цанва.
— Гатфарин, гатун чими йикъара тамара цIаяр кьунин хаталувал артух жезва, — лугьузва районрин уртах лесопожарный отделдин начальник Къадир Межидова. — Тама цIай кьунин дуьшуьш алай йисан апрелдин вацра Бутхуьруьн ва Сайтархуьруьн мулкара хьана. Вахтундамаз хабар хьунин ва тади серенжемар кьабулунин нетижада цIай хкадариз алакьна. Хаталувал тахьун патал игьтият квадар тавун чарасуз я. РД-дин тамарин майишатдин Комитетди тагькимарзава хьи, тама цIай кьур дуьшуьшар хьайитIа, тахсиркарар административный ва уголовный жавабдарвилиз чIугвада.
Тамар чи девлет, инсаниятдиз Худадин патай савкьат я. Гьавиляй чна тамар хуьн, абурун девлетар артухарун лазим я.
Тамари цIаяр кьур дуьшуьш хьайитIа, агъадихъ галай телефонрин нумрайриз зенг авун лазим я:
тамарин майишат хуьзвайбур — 8 800-100-94-00; РФ-дин МЧС-дин РД-да авай ГУ — 8 (8722) 39-99-99; РД-дин “Дагестанский лесопожарный центр” ГАУ — 94-01-02
Хазран Кьасумов
