Вахт санал акъвазнавач, ада виликди еримишзава. Гьар са вахтунихъни вичиз хас лишанар, кьетIенвилер ава. Ингье гад алукьнава. Им чуьлдин кIвалахрин лап къизгъин вахт я. ИкI, карханайрин, лежбервилинни фермервилин майишатрин ва агьалийрин вилик акъвазнавай асул кIвалахрикай сад алафар гьазурун я.
Сулейман-Стальский районда и кIвалахар гьикI кьиле физва? И суал чна райондин хуьруьн майишатдин ва суьрсетдин управленидин начальникдин заместитель Гьамидин Абдулкъафароваз гана.
— Санлай къачурла, алай йисуз карханайри, КФХ-ри ва хуьрерин зегьметчийри 23000 тонндилай виниз векьер ва 5000 тонндилай виниз самар гьазурун лазим я, — лагьана Гь.Абдулкъафарова. — ЦIи векьин уьруьшра, чIурухъан чкайра ва багълара булдаказ векь ава. Гьавиляй инанмишвилелди лугьуз жеда хьи, алафдикай дарвал жедач. ЦIи районда 25-26 агъзур тонндилай виниз векьер кIватI хъийида.
Векьер гьазуруникай рахадайла, Гь.Абдулкъафарова ихьтин са карни къейдна: районда гьам ири, гьамни гъвечIи карч алай гьайванрин кьадар йисалай-суз артух жезва. Малдарвилин хиле инвестицийрин са шумуд проект уьмуьрдиз кечирмишнава, малдарвилин чIехи карханаяр арадал гъанва. И кIвалах давамни жезва, иллаки — райондин дагъдин зонада, инсанар яшамиш тежезмай хуьрерин мулкарал.
Гьамидин Абдулкъафаровахъ галаз чун векьер кIватI хъувунал машгъул тир карханайриз, КФХ-риз фена. ЦIийи Макьарин, Эминхуьруьн, ДаркIуш-Къазмайрин хуьрерин мулкарал векьер яна саки акьалтIарнава. Алай вахтунда и кIвалах райондин дагъдин ценерив гвай хуьрерин чIурара кьиле физва. Кьуранвай векьер пресс-подборщикар галай 13 тракторди туькера кьазва. Гьар са гектардин багъларай (тарарин арайрай) 200-220 туьк акъатзава.
Чаз акурвал, булвилелди векь неинки багълара (тарарин арайра), гьакIни тIебии векьин уьруьшра, чIурухъан чкайрани ава.
Икьван чIавалди районда 16000 тонндилай виниз алаф гьазурнава.
Карханайрин, КФХ-рин ва арендаторрин магьсулрин никIер акурлани, чи гуьгьуьлар шад хьана. ГьикI лагьайтIа, никIера къуьлуьнни мухан бул бегьер агакьзава. Районда алафар гьазурунин кIвалахар давам жезва.
Хазран Кьасумов
