Кьурагь райондин КIирийрин хуьр Дагъустанда тIвар-ван авай, лезги халкь машгьур авурбурукай сад я. Инай игитар, алимар, шаирар, генералар, инженерар, шахтерар, эцигунардай устIарар, малдарар акъатна. Зи уьмуьрдин юлдашдин рагьметлу диде Пери гьа хуьряй я. ГьакI хьайила, ана мукьва-кьилиярни гзаф ава, шад ва пашман мярекатрани иштиракзава.
КIирида диндал кIевелай амалзавайбурни гзаф ава. Зи уьмуьрдин юлдашдин чIехи буба Мегьамед, Бубахва халуни и хуьруьн фекьияр хьанай. Заз и хуьр гзаф хуш я.
Фадлай зи фикирда авайди тир аниз фена, Советрин Союздин Игит Эсед Салигьован гуьмбетдал, Россиядин Игит Зейнудин Батманован, генерал Муьгьуьдин Къагьриманован сурарал цуьквер эцигун. Хуьруьн сурара, Дербент шегьердай хкана, КIири Бубадин кIарабар кучук хъувунва. Сурал КIири Бубадин шикил атIанвай къванни эцигнава.
Жуван мурад кьилиз акъудун патал зун КIирийрин хуьруьз рекье гьатна. Анин администрациядин кьил Алидаров Акима зун хушдиз кьабулна. Зун гьакI школа-интернатдин директор Тагьиров Надирахъ галазни таниш хьана. Чна пара метлеблу суьгьбетар авуна ва абуру Гъалибвилин суварин вилик са десте дустар галаз атана, игитрин сурарал цуьквер эцигунин зи фикирдал разивал къалурна.
Кьурагь райондин образованидин отделдин начальник Хариев Махачазни хабар гана. 6-майдиз зун, СтIал Сулейманан райондин образованидин управленидин начальникдин заместитель Къачабег Аминов, райондин информациядин отделдин начальник Гуьллера Камилова, отставкада авай полковник Мусайиб Загьиров, Кьасумхуьруьн телеканалдин къуллугъчияр КIи-ридиз рекье гьатна.
КIирийрин школа-интернатдин гьаятда тешкилай мярекат директор Тагьиров Надира ачухна. Ада аялриз Ватандин ЧIехи дяведикай Советрин халкьди ва Яру Армияди фашистрин Германиядин винел гъалибвал гьикI къазанмишнатIа, гьадакай суьгьбетна. За ва Мусайиб Загьирова, Къачабег Аминова исятда Украинада тухузвай махсус серенжемдин метлебдикай, ам гьикI кьиле физватIа гьадакай ихтилатна. Гуьллера Камиловади вичин алаваярни хъувуна.
Мярекатда аялри шиирар кIелна, ватанпересвилин манияр лагьана. Мугьманри, школьникри школа-интернатдин гьаятда авай Ватандин ЧIехи дяведин иштиракчийрин памятникдал цуьквер эцигна. Мярекатдиз Эсед Салигьован тIварунихъ галай юкьван школадин директор Фарман муаллим кьиле аваз аялар атанвай.
Школа-интернат Зейнудин Батманован тIварцIихъ янава. Ина 110 аялди кIелзава, 46 аял Кьурагь, СтIал Сулейманан, Хив, Мегьарамдхуьруьн, Ахцегь, Табасаран районрай атанва. Аялриз йикъа пуд чIавуз хуьрекар гузва. Паталай къвезвайбуруз яшамиш жедай хъсан шартIар тешкилнава.
Интернатдихъ 2 гектар чил гала. Зур гектар чилел ичерин, чуьхверрин, хутарин, пIинийрин къелемрин багъ кутунва. КIелзавайбурун къуллугъда библиотека, музей, столовой, спортзал, стадион акъвазнава.
Аялар волейболдин, боксдин секцийра машгъул жезва. Кьвед лагьай гьавада муаллимриз ял ядай кабинет ава. Ина вири жуьредин шартIар тешкилнава. Аялриз дуьзгуьн тербия гуниз школадин директорди еке фикир гузва. Ина гьар сувариз талукь мярекатар тухузва. Аялрин художественный самодеятельностди кIвалахзава. Технологиядин кабинетда аялриз сеняткарвилер чирзава. Хуьруьн администрациядин кьил А.Алидарова, райондин образованидин отделдин начальник М.Хариева ва хуьруьнвийри тестикьарайвал, интернатдин директор, РД-дин лайихлу муаллим Тагьиров Надира муаллимрин хъсан коллектив кIватIнава, аялриз хъсан тербия, чирвилер гузва.
Ахпа чун Э.Салигьован памятникдал, З.Батманован, М.Къагьриманован, КIири Бубадин сурарал фена, анрал цуьквер эцигна, дуьаяр авуна.
ИкI, зи рикIе авай мурад кьилиз акъатна. Хъсан инсанрихъ галаз таниш хьунал зун шад я. Сагърай зи лезги халкь!
Масуб Магьмудов