Советрин Союздин мулкар, шегьерар, хуьрер Гитлеран фашистрикай хуьн патал зурба уьлкведин вири халкьар къарагънай. Абуру Ватан хуьнни авуна, фашистрин лукIвиликай гзаф уьлквеярни азадна. Къизгъин женгера ва ахпа госпиталра телеф хьайи вирибурун гьакъиндай багърийрив дуьзгуьн малуматар агакь тавур дуьшуьшар гзаф хьана. Инсанар гилани Ватан патал чанар къурбанд авур чпин мукьвабурун суракьда ава. И карда телеф хьайи аскеррин гьакъиндай малуматар, сурар жагъурзавайбурун зегьмет екеди я. Абурун алахъунар себеб яз, гел галачиз квахьай агъзурралди аскеррин тIварар чир хъхьана.
Кеферпатан Осетиядин чилелни душмандихъ галаз къати женгер кьиле фейиди я. Кавказ немсерикай хуьн патал Дагъустандайни гзаф гуьгьуьллубур фронтдиз фенай. Абурук хейлин лезгиярни квай.
Кеферпатан Осетияда яшамиш жезвай дагъустанвийрин кIватIалдин (диаспора) кьил Сулейман Жахаева чаз ихьтин хабар гана. Алай йисан 8-майдиз Моздокдин райондин Малгобек шегьерда Ватандин ЧIехи дяведин женгера телеф хьайи ва Осетиядин чилел сур кьисмет хьайибур рикIел хкидай мярекат кьиле фида. Аниз телеф хьайибурун багърийризни теклифзава.
Чав агакьарнавай делилралди, стхавилин сурара хейлин дагъустанвияр, гьа гьисабдай яз лезги халкьдин векиларни кучукнава. Агъадихъ чна абурун тIварар кхьизва.
— Гьажиев Мегьамед Гьарунович, жергедин аскер, 1919-йисуз дидедиз хьана, Докъузпара райондин Гъугъанрин хуьр.
— Рамазанов Али Рамазанович, сержант, 1902-йисуз дидедиз хьана, Кьурагьрин хуьр.
— Мегьамедов Букар Мегьамедович, жергедин аскер, 1917-йисуз дидедиз хьана, Кьурагьрин хуьр.
— Фатулаев Мегьамед Фатулаевич, жергедин аскер, 1904-йисуз дидедиз хьана, Кьасумхуьруьн райондин Татарханрин хуьр.
— Кълычев Къазай Хайевич, жергедин аскер, 1912-йисуз дидедиз хьана, Кьасумхуьруьн райондин Татарханрин хуьр.
— Сердеров Абдурагьим, жергедин аскер, 1923-йисуз дидедиз хьана, Рутул райондин Лучекрин хуьр.
— Къурбанов Хатий Искендарович, жергедин аскер, 1923-йисуз дидедиз хьана, Рутул райондин Лучекрин хуьр.
— Тагъиев Башир Тагъиевич, жергедин аскер, 1906-йисуз дидедиз хьана, Хив райондин Цналрин хуьр.
Эгер Малгобекдиз физ, чпин багърийрин гьакъиндай малуматар чириз кIанзавайбур аватIа, Жахаев Сулейманаз зенг ийиз жеда. Адан телефондин нумраяр: 8 928 482 96 71.
Хийир Эмиров
