Кеферпатан Кавказдин федеральный округдин субъектри агьалияр тамамдаказ таъминарун ва Россиядин маса регионризни куьмек гун патал недай суьрсет бес кьадар гьасилзава.
Техил гьасилунин карда СКФО фадлай донор тир регионрин жергедик акатзава. Як ва нек гьасилунин кьадардал гьалтайлани, округ кIвенкIвечийрин арада ава. Идакай Россиядин экономика вилик тухунин министрдин заместитель Сергей Назарова малумарна.
“Кеферпатан Кавказди техилдай, якIун ва некIедин суьрсетдай вичин игьтияжар фадлай саки тамамдаказ таъминарзава. Гьа са вахтунда, эгер агропромдин хиле къецепатан уьлквейрай гъизвай суьрсет ватанда гьасилзавайдалди эвезунин лазимвал авачтIани, производстводик йигинвал кутун, ам гегьеншарун герек я, гьикI хьи, ина гьасилзавай суьрсетдихъ авай игьтияж екеди я. ТIебии ва михьи продуктар патал региондиз вири уьлкведай агьалияр къвезва”, — агакьарзава С.Назарован гафар “Кавказ.РФ” АО-дин пресс-къуллугъди.
ИкI, Росстатдин делилралди, техилдин базарда СКФО гьамиша вилик чкадал ала. Алатай йисуз Ставрополдин крайда техилдин бегьер тахминан 9,4 миллион тонндиз барабар тир, гьа са вахтунда вичи вичин игьтияжар тамамарун патал региондиз анжах 2,6-3 миллион тонн герек я.
Кеферпатан Кавказдин округ якIалди ва якIукай гьазурнавай недай суьрсетдалди таъминарунин дережа 111,2 процентдиз барабар я. И жигьетдай виридалайни хъсан нетижаяр Ставрополдин крайдихъ, Карачаево-Черкесиядихъ ва Кабардино-Балкариядихъ ава.
Амма нек гьасилунин жигьетдай виридалайни вилик Дагъустан ква. Алатай йисуз республикада СКФО-дин субъектра санлай жезвай кьадардин пудан са пай — 935 агъзур тонн нек гьасилна.
Хуьруьн майишатдин проектар Кеферпатан Кавказ патал кар алайбур я. Гьаниз килигна, алай вахтунда “Кавказ.РФ” АО-да бизнесдиз куьмек гуниз талукь оперативный шатбди кIвалахзава — санлай къачурла, 30 миллиард манатдин къимет авай цIудралди проектриз куьмек гунин рекьер гьазурзава. Абурун арада кар алайбур туриствилин ва агропромышленный хилеринбур я.
«Лезги газет»
