“Йисан муаллим -2022” конкурсдин региондин паюнин гъалибчийриз ва вилик чкаяр кьурбуруз пишкешар гунин серенжем и йикъара Махачкъалада, Урусрин драмтеатрдин залда кьиле фена.
Конкурсдин нетижаяр кьунин шад мярекатда РД-дин Гьукуматдин Председателдин заместитель Муслим Телякавова, Халкьдин Собранидин образованидин ва илимдин рекьяй комитетдин председатель Елена Павлюченкоди, Каспийскдин мэр Борис Гонцова, РД-дин халкьдин образованидин ва илимдин работникрин профсоюздин тешкилатдин председатель Мегьамед Амиродинова, Дагъустандин вузрин, ссузрин ректорри ва муаллимри иштиракна. Абур патал художественный ансамблри ва халкьдин артистри концертдин программани гьазурнавай.
Муслим Телякавова муаллимрин конкурсдин гъалибчийриз тебрикдин келимаяр лагьана ва гуьгъуьнлай, яни республикадилай къерехда жедай паярани абурухъ виниз тир агалкьунар хьуник умуд кутуна.
“30 йисалай гзаф вахт хьанва “Йисан муаллим” конкурсди виридалайни бажарагълу, гужлу зигьиндин муаллимар санал кIватIиз. И конкурс вири халкьдин арада кьиле физвай гьерекатдиз элкъвенва. Гьар са иштиракчи чна гъалибчи яз гьисабзава, гьикI лагьайтIа, абуру чпин тежриба амайбуруз раиждай къарар кьабулна, вилик квай имтигьанрихъай кичIе хьанач, — къейдна М.Телякавова. — Муаллим чирвилер агакьарзавай касдилай виниз тир дережадин инсан я. Ада мектебда кIелзавай аялрин руьгьдинни ахлакьдин, эдебдин бинеяр арадал гъизва. Гьадалай аслу я гележег ва гьадак кутазва чна еке умудар”.
Дагъустандин виридалайни хъсан муаллим лагьай тIвар къазанмишун патал цIи 545 муаллимди женг чIугуна. Региондин паюнин иштиракчияр муниципалитетра гъалиб хьайи 55 муаллимдикай хьана. Са жерге имтигьанрай экъечIайдалай кьулухъ 5 финалист ва номинацийрин гъалибчияр тайинарнава.
“Муаллимди къугъвазвай роль екеди я. Аялри гзаф дуьшуьшра адалай чешне къачузва. Гьаниз килигна, педагог акьалтзавай несил патал хъсан чешне хьун иллаки важиблу я, — къейдна Ягья Бучаева. — Конкурсда муаллимри цIийи танишвилер арадал гъана, пешекарвал хкажна, республикадин гзаф муниципалитетрай тир амадагрихъ галаз алакъаяр тайинарна. Муаллимрин гьевеслувал акьван хкаж хьанва хьи, гила абурувай виликрай авай хьтин гьалдиз гьич хквез жедач. Имни гъалибвал я”.
2022-йисуз Дагъустандин виридалайни хъсан муаллим Каспийск шегьердин 14-нумрадин многопрофильный лицейдин урус чIалан ва литературадин муаллим Олеся Петровадикай хьанва. Конкурсдин пишкешар Къаякент райондай тир химиядинни биологиядин муаллим Фатима Мегьамедовадиз, Махачкъаладай тир изобразительный искусстводин муаллим Асият Кабукаевадиз ва ингилис чIалан муаллим Шуайнат Хаштиховадиз, Буйнакскдай тир ингилис чIалан муаллим Рашия Османовадиз гана.
Дагъустандин виридалайни хъсан муаллимди конкурсдин федеральный паюна республикадин патай иштиракда.
РикIел хкин, “Йисан муаллим -2022” конкурс Дагъустан Республикада образованидин йис къейд авунин сергьятра аваз кьиле тухузва.
«Лезги газет»
