Алкьвадар Гьасан эфендидин — 190 йис

23-ноябрдиз Дербент шегьерда, Лезги театрдин дараматда, чкадин мектебра чирвилер къачузвай аялрин арада машгьур алим, тарихчи, арифдар, шаир Алкьвадар Гьасан эфендидин шиирар хъсандиз кIелунай конкурс кьиле тухвана. Ам мергьяматлувилин «Дербент кIвачел акьалт хъувун» фондуни тешкилнавай.

Шаир, алим Азиз Мирзебегова, иштиракчийриз мярекат мубарак авуналди, и вакъиадиз къаюмвалзавай мергьяматлуви­лин фондуникай гаф лагьана­. Ам тешкилнавайди Дагъус­тан­дин Халкьдин Собранидин­ де­путат, машгьур меценат Имам Яралиев я.

Конкурсда 29 аялди иштиракна. Абур кьве дестедиз пайнавай (сифтегьан ва чIехи классра кIелзавайбур).

Аялрин алакьунриз къимет гузвай жюридик Лезги театрдин директор Динара Эминова (председатель), театрдин кьилин режиссер, РД-дин лайихлу артист Казбек Думаев, РД-дин искусствойрин лайихлу деятель, композитор, «Лезги газетдин» хсуси мухбир Къагьриман Ибрагьимов, Дербентдин педколледждин лезги чIаланни литературадин муаллим Рагнета Алибегова, шаир, РД-дин лайихлу муаллим, хайи чIаланни литературадин кьилин дережадин муаллим Гъуланге­рек Ибрагьимова, «Дербент кIва­чел акьалт хъувун» фондунин крар идара ийизвай директор Саид Мусаев  квай.

Нетижаяр кьурдалай кьулухъ гъалибчиярни тайин хьана. ИкI, сад лагьай дестеда 1-чкадиз Къурбанов Фарид (СОШ № 13, 3-кл., муаллим Л. Севзиханова), 2-чкадиз Рашидова Салима (гимназия № 2, муаллим А. Магьмудова), 3-чкадиз Азиза Гьасанова (дуьньядин медениятдин гимназия, муаллим Альвина Уружева) лайихлу хьана.

Кьвед лагьай дестеда 1-чкадиз Перис Исаева (СОШ №11, 7-кл., муаллим А. Жаватова)­, 2-чкай­риз Муьгьуьдин Гьаса­нов (дуьньядин медениятдин­ гимназия, 7-кл., муаллим Т. Магь­му­дова), Алим Аскеров (СОШ № 20, муаллим Р. Муъминова)­, 3-чкайриз Разият Мирзое­ва (СОШ № 3, муаллим А. Къаф­ла­­нова), Марта Алимурадова­ СОШ № 13, муаллим Наида Яралиева) лайихлу хьана.

Гъалибчийрив ва абур гьазурай муаллимрив гьар садав Саид Мусаева 1-чкадай -10 агъзур манат, кьвед лагьай кьве чкадай — 7 агъзур манат ва пуд лагьай 3 чкадай 5 агъзур манатдин кьадарда аваз пулдин пишкешарни грамотаяр вахкана.

Къагьриман  Ибрагьимов