1-июлдилай Кьиблепатан Дагъустандин футболдин лига (ЮФЛ) башламиш жеда. Адан кьилин спонсор ва тешкилатчи Мегьа­мед Ярагъидин тIварунихъ галай мергьяматлувилин фонд я. Мадни мергьяматлувилин “Леки” фондуни чемпионат тешкилунин рекьяй, Кьиблепатан Дагъустандин фирмайрин сагьибри  (абурун кьадар 10-далай виниз я) спонсорвилин куьмекарни гуда. ЮФЛ-дин пишкешрин фонд 100 000 манатдилай виниз я. ЮФЛ-дин тешкилатчийрин гафаралди, гуьгъуьнин йисара лигада иштиракзавай командайрин кьадар — артух, гьакI пишкешрин фондни чIе­хи жеда. ЦIи 6 командади иштиракда.

Малум хьайивал, чемпионат 5 гьафтедилай (гьар гьафтедин жуьмя, киш ва гьяд йикъара са тур кьиле фида) гзаф вахтунда кьиле фида. Кьилди къачуртIа, 1-турдин къугъунра “Къуйсун”-”КьепIир”, “Миграгъ”-”Белиж” ва “Хив район”-”СтIал Сулейманан район” командайри (талукь тирвал, 1,2 ва 3-июлдиз) Къуйсунрин хуьруьн кьилин стадиондал (Гилийрин хуьруьн стадион резервда ава) чпин устадвал къалурда. Къугъунар нянин сятдин 5-даз башламиш жеда.

* * *

Алатай гьафтеда футболдай Дагъустандин чемпионатдин сергьятра аваз кьиле фейи нубатдин турдин къугъунра Ме­гьа­рамдхуьруьн “Леки” ва “УОР Каспийск” командаяр “гуьруьшмиш” хьана. Къугъун­ 2:0 гьисабдалди акьалтIна. Дагъустандин чемпионатдин турнирдин таблицада “Леки” 1-чкадал ала.

Рагнеда Рамалданова