Са тIимил йикъар идалай вилик Махачкъалада кьуршахар кьунай Дагъустандин ва Белоруссиядин федерацийри санал кIвалахунин къарардал къулар чIугуна. Идакай РД-дин спортдин ва физический культурадин министерстводин пресс-къуллугъди хабар гузва.
РикIел хкин: кьуршахар кьунай Белоруссиядин федерациядин кьиле чи машгьур ватанэгьли, вичин ери-бине СтIал Сулейманан райондай тир, грекринни римлуйрин жуьреда кьуршахар кьунай дуьньядин кьве сеферда чемпион (2005 ва 2011-йисар), Белоруссиядин спортдин лайихлу мастер Алим Селимов акъвазна тамам са йис хьанва. Алай вахтунда ам багърийрал кьил чIугваз хтанва.
Малум хьайивал, Дагъустандин ва Белоруссиядин кьуршахар кьунин федерацийри азаддаказ, грекринни римлуйрин ва дишегьлийри кьуршахар кьунин жуьреяр вилик тухунин ва машгьурунин хилера саналди кIвалахун, гьакIни Олимпиададин къугъунриз, дуьньядин ва Европадин чемпионатриз, международный акъажунриз гьазурвилер аквадайла, тренировкаярни сборар санал кьиле тухун, идалди кьве республикадин спортсменрин тежрибадикай менфят къачун пландик ква.
— Санал кIвалахунин ва гьасиррал чи арада фадлай авай стхавилин алакъаяр чна къе чарарал къулар чIугуналди тестикьарнава. Дагъларин уьлквединни Белоруссиядин арада сих алакъаяр гьеле СССР-дин девирда арадал атана ва Александр Медведь федерациядин кьиле акъвазай вахтунда абур генани мягькем хьайиди къейд ийиз кIанзава. Кьуршахар кьунин жуьреяр мукьвал гележегда вилик тухун патал чахъ санал кьилиз акъудиз кIанзавай фикирар, проектар гзаф ава, — лагьана документдал къул чIугурдалай кьулухъ Дагъустандин кьуршахар кьунай федерациядин регьбер Гьайдар Гьайдарова.
Адан гафарай мадни малум хьайивал, Белоруссиядин ва Дагъустандин арада мягькем алакъаяр хьайиди мадни а делилди субутзава хьи, турнирра ва санал кьиле тухуз хьайи сборра иштиракун патал яргъал йисара делегацияр чинай Белоруссиядиз фена, анайни Дагъустандиз атана. Идалайни гъейри, Минскда А.Медведан гьуьрметдай кьиле тухузвай Гран-Придиз, Россиядин хкянавай команда квачиз, кьилди Дагъустандин командадизни иштиракдай мумкинвал гьамиша гайиди я.
Дагъларин уьлкведин хейлин спортсменриз Белоруссиядин хкянавай командада иштиракун патал теклифайдини, адак кваз кесерлу акъажунра виниз тир нетижаяр къазанмишиз алакьайдини къейд тавуна жедач. Алим Селимова спортда мягькем камар Дагъустанда къачунатIани, дуьньядин чемпионвилин тIварар ада кьве сефердани Белоруссияда къазанмишайди рикIел хквезва.
Рагнеда Рамалданова
