Зун ягъалмиш туштIа, Кьиблепатан Дагъустанда армейский къайдада гъилералди кукIунай (АРБ) алай вахтунда авайди анжах са клуб я. “Кьурагь” тIвар алаз ВСК (военно-спортивный клуб) Кьурагьа кардик ква. РикIел хкин: клубдин бине эцигайди, ам арадал гъайиди армейский къайдада гъилералди кукIунай Дагъустандин, Россиядин военный рекьяй къуллугъчийрин арада чемпион,  чIулав чIулунин сагьиб, Россиядин спортдин мастер Фахрудин Абумислимович Гьамидов я. 2001-йисуз Кьурагьа ДЮСШ-дин базадал а чIавуз райондин кьил Гьамидов Сефербег Гьамидовичан ва аялринни жаванрин спортшколадин директор Будаев Шабан Рамазановичан куьмекни  галаз арадал гъайи и клубди гзаф жегьилриз, хъсан гьазурлухвал хьиз, чешнелу тербияни гана. Абурукай республикадин чемпионарни, Вирироссиядин акъажунрин гъалибчиярни хкатна. Шамиль Османов, Къурбан Герейханов, Сулейман Будаев, Самурай Бабахваев, Рамазан Мамедов, Намик Мусаев, Мегьамед-Эмин Гьажиев, Азиз Хидирнабиев абурун жергедай я.

Са вахтарилай Фахрудин Гьамидов кIвалахдихъ галаз алакъалу яз респуб­ликадин меркездиз хъфин лазим атана. Клуб, и рекьяй пешекар тахьуниз килигна, агалдайвал хьана. Амма… “Пак чка ичIи яз амукь­дач”, лугьузва бубайрин мисалда. Ф.Гьамидован кар адан гъилик вердишвилер къачур спортсмен, Дагъустандин чемпион, Россиядин чемпионатдин призёр, армейский къайдада гъилералди  кукIунай спортдин мастервиле кандидат Къурбан Герейханова давамар хъувуна. Алай вахтунда адан гъилик устадвал хкажзавай аялрин кьадар 30-дав агакьнава. Абуру республикада кьиле физвай жуьреба-жуьре турнирра ва акъажунра къазанмишзавай нетижайри тренердин кIва­лах­дин бегьерлувал къалурзава. Мукьвал вахтар ри­­кIел хкайтIа, алатай йисуз Эрзиман Фетхулаев Дагъустандин Кубокдиз лайихлу хьана. ЦIинин йисан алатнавай варцара “Кьурагь” клубда вердишвилер къачузвай жаванри республикадин дережадин 3 акъажунра иштиракнава. ИкI, февралдиз Каспийскда, Али Алиеван тIвару­нихъ галай спортдин дворецда, армейский къайдада гъилералди кукIунай Дагъустандин кIвен­кIвечивал патал кьиле фейи акъажунра Эрзиман Фетхулаев — 1, Эрзиман Эмирбегов ва Имам Алибегов — 2, Нариман Эмирбегов ва Умар Алибегов 3-чкайриз лайихлу хьана.

Мартдиз Каспийскда, Къ.Къурамегьамедован тIварунихъ галай спортшколада, “Жегьил армеец” лишандик кваз, 2010-2011-йисара дидедиз хьайи жаванрин арада ачух кIвенкIвечивал патал акъажунар кьиле фена. Къурбан Герейханован гъилик вердишвилер къачузвай Имам Алибегова, Умар Алибегова, Нариман Эмирбегова — 1 ва Мегьамед Мегьамедова 2-чкаяр кьуна.

Апрелдиз Махачкъалада, автомобильно-дорожный колледждин спортзалда, Россиядин Игит Нурмегьамед Гьажиме­гьамедован экуь къамат рикIел хуьнин лишан яз, шегьердин ачух кIвенкIвечивал патал кьиле тухвай акъажунра республикадин жуьреба-жуьре пипIерай тир 150-далай виниз жаванри иштиракна. Абурун жергедай яз, “Кьурагь” клубда устадвал хкажзавай Эрзиман Фетхулаева, Эрзиман Эмирбегова, Нариман Эмирбегова — 1 ва Мансур Будаева 3-чкаяр кьуна.

Къейд авун лазим я хьи, республикадин вири акъажунра 1-чкаяр кьунвай Э.Фетхулаев армейский къайдада гъилералди кукIунай республикадин хкянавай командадик кутунва. Вилик Россиядин кIвенкIвечивал патал акъажунра иштиракун ква. Умудлу я, анайни жегьил гъалибвал гваз хкведа.

Са кар мадни алава хъийиз кIанзава: Къурбан Герейханова жаванар ватанпересвилин, руьгьдинни ахлакьдин жигьетдай тербияламишунизни артух фикир гузва. Шаксуз, ам районда, гьакI республикадани хъсан тренеррин жергеда ава. Адан гъилик вердишвилер къачузвай аялрин агалкьунри, нетижайри и кардин патахъай шагьидвалзава.

Къ.Герейханован гафарай малум хьайи­вал, райадминистрациядин спортдин комитетдин председатель Рамиз Рамазанова клубдиз, гьа гьисабдай яз жаванар республикадин акъажунриз иштиракиз фидайлани, алакьдай вири жуьредин куьмекар гузва. “Кьурагь” клубдихъ спонсорар ва ко­ман­дадин векилар мадни ава — Фахрудин Гьамидова ва Сулейман Будаева лазим ви­ри куьмекар абурув агакьарзава. И кардай абурузни, Рамиз Рамазановазни клубдин регьберди ва жаванри сагърай лугьуз­ва.

Гаф кватай чкадал лугьун хьи, Фахрудин Гьамидов Дагъустандин армейский къайдада гъилералди кукIунай федера­ция­дин судьяйрин коллегиядин предсе­датель я. Адан теклифдалди Кьура­гьа Да­гъустандин спортдин и жуьредай феде­рациядихъ галаз санал  республикадин де­режадин турнир кьиле тухун пландик ква.

Са кар заз мадни кьетIендаказ къейд ийиз кIанзава: Фахрудин Гьамидов, спортдиз еке фикир гунихъ, акьалтзавай несилдин къайгъударвал авунихъ галаз сад хьиз, хайи чIал хуьникни вичин лайихлу пай кутаз чалишмиш жезва. ИкI, ада кьурагьвийрин 50 хизандиз вичин такьатрихъ “Лезги газет” кхьиз са шумуд йис я.

Къуй лезги халкьдин тIвар виниз хкаж хьунихъ, аялрихъ бахтлу гележег хьунихъ ялзавай, рикI кузвай гьар са касдихъ чандин мягькем сагъвал, мадни агалкьунар хьурай!

Рагнеда Рамалданова