Алатай гьафтедин ял ядай йикъара Каспийскда, Али Алиеван тIварунихъ галай спортдин дворецда, азаддаказ кьуршахар кьунай “Алиеван” турнирда дуьньядин 19 уьлкведай тир 280-далай виниз “азадбуру” гьасиррал чпин гьунарар къалурна. Россиядин хкянавай командади ана 33 медаль къазанмишна, абурукай 24 — Дагъустандай тир спортсменри.
Турнирда чпикай спортдин кесерлу майданра икьван гагьдини хабар ганвай чи халкьдин векилрини иштиракна.
ИкI, Бегхан Мисриханова 79 кг-дал къведалди заланвал авайбурун арада финалдиз акъатдалди 3 бягьсина гъалибвал къазанмишна, сад вахт куьтягь жедалди акьалтIарна. Гьажимурад Алихмаевахъ галаз финалда тIарвал себеб яз, бягьс эхирдалди акьалтIариз хьанач. Ам гимишдин медалдиз лайихлу хьана, идалди алатай йисан нетижа тикрарна.
Рамазан Ферзалиева 65 кг-дал къведалди заланвал авайбурун арада финалдиз акъатдалди 4 бягьс кьиле тухвана, абурукай кьведни вахт куьтягь жедалди акьалтIарна. Дуьньядин ва Европадин чемпион Абасгьажи Мегьамедовахъ галаз финалда чи ватанэгьли гимишдин медалдиз лайихлу хьана.
Р. Рамалданова
