Алай йисуз Россияда аялрин кешбэкдин (гайи гьакъидин са кьадар пай элкъвена вахкунин) программа 31-мартдиз къуватда гьатда. Аялар ял ядай лагерриз кьезил къиметдай 1-майдилай, гьакIни гатун кьиляй-кьилиз рекье тваз жеда.
“Алатай йисуз хьиз, путевкадихъ гайи гьакъидин 50 процент пул, амма 20 агъзур манатдилай гзаф тушиз, элкъуьрна вахкуда. Пул вад йикъан вахтунда “Мир” картадиз хкведа. Гзаф аялар авай хизанривай маса къачур гьар са путевкадихъ гайи гьакъидин 50 процентдив агакьна вахчуз жеда. Аялрин яшдиз талукь сергьятвилер авач. Са ва я са шумуд аялдивай кьезил къиметдай ял ягъиз жедай сменайрин кьадарни сергьятламишнавач”, — къейдна РД-дин образованидин ва илимдин министрдин заместитель Аида Далгатовади.
РФ-дин просвещенидин министерстводай проектда иштиракуниз талукь яз рекье тур чарчин бинедаллаз, РД-дин образованидин ва илимдин министерстводи федеральный идарадив Дагъустан Республикадин мулкунал алай ва РД-дин официальный реестрда гьатнавай аялрин ял ядай ва сагъламардай тешкилатрин сиягь агакьарнава. Гьа са вахтунда министерстводи къейдзавайвал, реестрдик кутунвай ва республикадин шегьеррин къерехра авай ял ядай ва сагъламардай лагерра (хсусиятдин вири жуьрейрин) 2022-йисуз ял ягъун патал путевкаяр РД-дин бюджетдин такьатрихъ маса къачунва, гьаниз килигна, и тешкилатрин путевкаяр аялрин диде-бубайриз пулдихъ маса гунин къайда фикирда кьунвач.
И кар себеб яз, республикадин реестрда гьатнавай сагъламардай тешкилатри кешбэкдиз талукь программада иштиракзавач. Дагъустанди аялар ва жаванар сагъламарунин карда государстводин патай гузвай куьмек хуьзва. И кардин бинеда пулсуз путевкаяр гун ава.
Идалайни гъейри, РД-дин образованидин ва илимдин министерстводин тIварцIел диде-бубайри (законлу векилри) Дагъустандин мулкунал алай лагерриз хсуси гьакъидихъ маса къачунвай путевкайрин гьакъиндай атай хабар авач.
Аялрин кешбэкдин программадай путевкаяр маса къачуз жедай лагеррин (сагъламардай тешкилатрин) тамам сиягь интернетда авай официальный порталдин — мирпутешествий.рф — “Аялрин лагерар” чина чапнава. Диде-бубайривай инай чпиз бегенмиш хьайи чка хкягъиз ва лагердин, туроператордин путевкаяр маса къачуз жеда.
«Лезги газет»
