Къуллугъчийрин арада коронавирусдин инфекция чукIунин вилик пад кьун, гьакIни Россиядин Кьиблепад ва Дагъустан Республика электроэнергиядалди атIунар авачиз таъминарун патал “РусГидро”  ПАО-дин Дагъустандин филиалдин гидроэлектростанцияр вахтадин жуьреда кIвалахдай къайдадал элячIнава, хабар гузва идарадин пресс-къуллугъди.

Вахтадин смена кьве гьафтеда давам жезва. И вахтунда ГЭС-дин кIва­лахдин дурумлувал таъминарзавай 155 къуллугъчидинни къеце­па­тан алакъаяр тамамдаказ атIузва­.

РусГидродин Дагъустандин фи­лиалдик санлай къачурла 1885,5 МВт-дин гужлувал авал 16 гидростанция, гьа жергедай яз Кеферпатан Кавказда виридалайни чIехиди тир Чиркейдин ГЭС (1000 МВт), Ирга­найдин ГЭС (400 МВт), Миатлидин  ГЭС (220 МВт), Гоцатлдин  ГЭС (100 МВт), Чирюртдин ГЭС-1 (72 МВт), Гель­бахдин ГЭС (44 МВт), гьакIни са жерге гъвечIи гидростанцияр акатза­ва.

Вахтадин жуьреда кIвалахунин къайдадал элячIунин къарар Да­гъус­тан Республикада хаталу азар чукIу­нихъ галаз алакъалу яз мура­каб­ гьалар арадал атунин  нетижада ва Да­гъустандин энергосистема патал  РусГидродин гидроэлектростанцийрин кIвалах  датIана гуьнгуьна хьунин­ важиблувал фикирда кьуна кьабулнава: республикадин гьасилзавай электроэнергиядин 99 процент РусГидродин ГЭС-ри гьасилзава. Абуру гьасилзавай электроэнергия, къейд ийин, Россиядин Кьибледин маса ре­гион­ризни рекье твазва, Чиркейдин ва Ирганайдин ГЭС-рин кIва­лах ла­гьайтIа, санлай къачурла, Кеферпатан Кавказдин энергосистема патал важиблу я.

Къенин юкъуз Дагъустан, ко­ронавирус акатнавайбурун кьа­дардал гьалтайла, Россияда 5-чкадал ала. Гьаниз килигна, РусГидроди Да­гъустан Республикадин районрин азарханайриз, медицинадин идарайриз мергьяматлувилин куьмек яз  кислороддин концентраторар ва медицинадин къуллугъчияр азардикай хуьн патал лазим парталар чара ийидай къарар кьабулнава.

РусГидродин Дагъустандин фи­лиалдин станцийрал къуллугъчияр вахтуналди яшамиш хьун патал ви­ри шартIар арадал гъанва, недай суьр­сетдалди таъминарнава.  Абурун сагъламвал хуьн патални кIеви серенжемар кьабулнава: къуллугъчияр инфекциядикай хуьдай та­кьатралди таъмин я, гьава михьи ийи­дай­ бактерецидный тадаракар кардик кутунва, дараматрин къенепатар инфекциядикай  михьи ийидай серенжемар кьабулзава, медицинадин ка­бинетар виниз тир гьазурлухвилин гьалда ава, къуллугъчийрин бедендин ифин датIана алцумзава.

РусГидро энергохолдингдин исполнительный аппаратда, вири филиалра ва идарадин къаюмвилик квай тешкилатра  оперативный штабри кIвалахзава. Абуру тIугъ­валдихъ галаз алакъалу гьаларал  датIа­на гуьзчивалзава ва и жигьетдай государстводин талукь органрихъ галаз алакъада аваз кIвалах­зава. Къуллугъчийрин сагъламвал коронавирусдин инфекциядикай хуьн патал лазим вири серенжемар тамамдаказ кьилиз акъудзава.

Идарадин офисрин 85 процент  пешекарар яргъал мензилда аваз кIвалахдай къайдадал алуднава. Муьштерийрихъ галаз алакъаяр  тамамдаказ  яргъал мензил арада авай къайдада тешкилнава.

Идалайни гъейри, апрелдин вацра РусГидродин ресурсралди  таъминардай компанийри вири жуьре муьштерияр электроэнергиядин, кIвалера чимивилин ва кузвай цин гьакъи тагайла  илитIзавай  жермедин серенжемрикай (пенядикай) са вацран вахтунда  азадна.

КьетIен гуьзчивилик гьакIни  агьа­лияр сотовый алакъадалди ва интернетдалди таъминардай объ­ек­тар, логистикадин чIехи центраяр, алишверишдин тешкилатар ва туьквенар, медицинадин ва аптекайрин идараяр, call-центраяр электроэнергиядалди таъминарунин месэлаяр ква.

Вири и серенжемри электроэнергетикадин объектрин  дурумлу кIвалах таъминарзава.

Амина  Муслимова