И мукьвара чи тIвар-ван авай ватанэгьли, вичин уьмуьрдин 60 йис медицинадин хиле къуллугъ авуниз бахшнавай РФ-дин, РД-дин лайихлу духтур, РФ-дин ва РД-дин здравоохраненидин, СССР-дин гражданвилин оборонадин отличник лагьай тIварарин ва гьукуматдин, шегьердин администрациядин патай ганвай хейлин шабагьрин сагьиб Агъамегьамед Хаметович Хаметова 85 йисан баркаллу юбилей къейдна. Ихьтин ксари чи халкьдин «къизилдин» фонд тешкилзава.
Лишанлу мярекат Махачкъалада профессор Мугьамад Букар Нагъметулаевич Гьамидуллаеван тIварунихъ галай инсан виликди тухудай Академиядин конференц-залдани кьиле тухвана. Анал А.Хаметовав И.В.Сталинан ирс чирунай Вирироссиядин ватанпересвилин гьерекатдин сад тир къарардалди Ватандиз вафалувал къалурунай, здравоохранение вилик тухунай, виниз тир пешекарвиляй профсоюздин гьерекатда яргъал йисара гьакъисагъвилелди зегьмет чIугунай «Генералиссимус И.В. Сталин» къизилдин орден вахкана. Идалай вилик лагьайтIа, Дагъустандин здравоохранение вилик тухунин карда кьетIен лайихлувилерай Дагъустандин общественный тешкилатрин «Ватан хуьдайди» Союздин къарардалди Агъамегьамед Хаметович «Честь и гордость Дагестана — Золотой орел» ордендиз лайихлу хьайиди рикIел хкиз кIанзава.
А.Хаметов 1939-йисан январдиз Докъузпара райондин Макьарин хуьре дидедиз хьана. Дяведин йисарин вири аялрин хьиз, адан кьадар-кьисметни туькьуьлди хьана. Хцин зур йисни тахьанмаз, буба стIалжемдикди рагьметдиз фена. 1958-йисуз еке агалкьунралди мектеб акьалтIарай жегьилдиз Советрин Армиядин жергейриз эвер гана. Ада къенепатан кьушунра 3 йисуз къуллугъна. Жегьил аскердин ва санитарный инструкторрин курсара кIелна. Гуьгъуьнлай Дагъустандин мединститутдин лечфакдиз гьахьна. Вуз акьалтIардалди, Агъамегьамед Хаметовичан дидени рагьметдиз фена. И магьрумвили жегьилдин рикI къарсурна.
Агъамегьамед Хаметовича кIвалахай чкайрикай, кьилиз акъудай кьван везифайрикай яргъалди кхьиз жеда. Ам уьмуьрдив эгечIзавай тегьер кьетIендаказ къейд ийиз кIанзава. Жегьил пешекардиз Мегьарамдхуьруьн ЦРБ-да кьилин духтур яз кIвалахун теклифайла, ада кьил кутуначир. Ада кьилин духтур азарлудаз вири патарихъай куьмекар гуз алакьдайди хьун лазим яз гьисабзавай. Тежриба къачунин ва пешекарвал хкажунин макьсаддалди ада Пермдин областдин Верещагино шегьердин ракьун рекьин больницадиз финин къарар кьабулна. Сифтедай адахъ са палата, ахпа вагонрин заводдин здравпункт галкIурна…
Гуьгъуьнлай гражданвилин оборонадин медкъуллугъдин духтур, участковый терапевт, «Дагрыбпромдин» кьилин духтурдин заместитель, медико-санитарный частунин поликлиникадин заведующий яз кIвалахай А.Хаметовал ДАССР-дин минздравдин 2-отделдин начальниквилин, меркездин дезинфекциядин станциядин кьилин духтурвилин, Махачкъала шегьердин здравоохраненидин отделдин заведующийвилин везифаяр ихтибарна. КIвалахни ийиз, ада вири и йисара гзаф кьадар курсарани кIелна. ИкI, Советрин ва Россиядин медицинадин идарайра терапевт, кардиолог, невролог пешейрай, гьакIни здравоохраненидин организаторвилин ва гражданвилин оборонадин медкъуллугъдин рекьерай пешекарвал мадни хкажна.
Хейлин йисара А.Хаметова Махачкъаладин медработникрин профсоюзрин сифтегьан тешкилатрин советдин председателвилин везифаяр кьилиз акъудна. 20 йисалайни артух вахтунда ада республикадин здравоохраненидин халкьдин контролдин штатдинди тушир отделдиз регьбервал гана. ДатIана общественный тапшуругъар кьилиз акъудна. 2019-йисалай ам РФ-дин здравоохраненидин работникрин профсоюздин Дагъустан Республикадин комитетдин пешекар-консультант я. Лугьун лазим я хьи, Дагъустанда залан тIугъвалдикай малум хьайи гьа сифте йикъара ада вич — гзаф йисарин тежриба, виниз тир пешекарвал авай духтур — агьалийрин сагъламвал хуьнин къаравулда акъвазиз гьазур тирди къалурна. Гьа икI, залан азардихъ галаз женгина А.Хаметов кIвенкIве хьана.
КIвалахай гьар са чкада Агъамегьамед Хаметова вич хъсан регьбер, тешкилатчи, кар алакьдай инсан яз къалурна. Адан тIвар датIана ДАССР-дин халкьдин контролдин гьуьрметдин доскада хьана. Пешедиз вафалу тушир, азарлуйрив жавабдарсузвилелди эгечIдай духтурар адаз такIанда. Агъамегьамед Хаметовича ахьтинбурухъ галаз датIана женг чIугуна, гилани чIугвазва. Ихьтин са шумуд дуьшуьшдин, ам халкьдихъ рикI кудай, лугьурвал, чIехи рикI авай инсан тирдан шагьид зунни хьана. Пешедиз вафалувал хуьн ада вичин уьмуьрдин кьилин макьсад яз гьисабзава.
Намуслудаказ зегьмет чIугвазвай ватандашрикай чаз чир хьун лазим я. Медицинадин хилен зегьметдин игит, кьетIен бажарагъдин, агалкьунрин сагьиб, медицинадин чIалалди лагьайтIа, кьетIен «сплавдинди» тир Агъамегьамед Хаметовичаз чна юбилей рикIин сидкьидай тебрикзава. Къуй Квехъ уьмуьрдин юлдаш-сирдаш Галина Субгьановнадихъ галаз санал чандин сагъвал, рухвайрикай, хтулрикай рикIин динжвал, мадни яргъал йисар, мадни юбилеяр хьурай!
Рагнеда Рамалданова
