Алай вахтунда Румыниядин меркезда (Бухарест) кьуршахар кьунай Европадин чемпионат давам жезва. Ана иштиракай чи ватанэгьли, вичин ери-бине Ахцегьай тир Анвар Аллагьярова (63 кг) грекринни римлуйрин жуьреда кьуршахар кьунай буьруьнждин медаль къазанмишна. Европадин чемпионатда неинки Дагъустандин, гьакI санлай Россиядин спортсменрикайни мад медалдиз лайихлу хьайиди авач.
Гьайиф хьи, чи уьлкведин спортсменар «басрухрикай» хкатнавач, абуруз талукь яз тухузвай кьил акъат тийидай сиясат акьалтIнавач. И сефердани чи уьлкведин спортсменри бейтереф атлетар яз (AIN) иштиракна. Анвараз вичи Европадин чемпионатда иштиракуникай Россиядин хкянавай команда Румыниядиз физ са югъ амаз хабар хьана, гьикI хьи, и акъажунра иштиракун патал гьазур хьанвай Жамболат Локьяеваз Румыниядиз виза ачухнач. Идалайни гъейри, Анвар Аллагьярова (вичин заланвал 60 кг яз) вич вердиш тушир заланвилин категорияда иштиракдайвал хьана. ИкI, чи ватанэгьлидиз Якопо Сандрон (Италия) 9:0, Энес Башар (Туьркия) 10:9 гьисабралди кумукьна (амма судьяйри туьрквидиз садлагьана 6 балл квяй ганатIа кьил акъатнач). Ярумчух финалда Азербайжандай тир Мурад Маммадовахъ галаз бягьс 3:3 гьисабдалди акьалтIна, инани артуханвал Туьркиядин векилдиз гана. Буьруьнждин медаль патал бягьсина А.Аллагьяроваз латыш Александр Юрканс гьеле 1-паюна 9:0 гьисабдалди кумукьна.
Къейд. Россиядин, Европадин ва 23 йисал къведалди яшда авайбурун арада дуьньядин чемпион, хейлин акъажунрин ва международный турниррин гъалибчи тир А.Аллагьяров акъажунриз Москвадин областдин патай экъечIзава. Алай вахтунда ада Великие Луки шегьерда физкультурадин ва спортдин госакадемияда кIелзава.
Регина Семедова
