Инсан чилел тек са вичин хсуси бахтлувал патал яшамиш жезвайди туш. Ам инсанвилин гьайбатлу къанунрин гъавурдани хьун лазим я.
Уильям Гладстон
Ихьтин къанунрин гъавурда хъсандиз авай, Мегьарамдхуьруьн райондин Филерин хуьре яшамиш жезвай Желил Желилова и мукьвара асирдин юбилей къаршиламишна. Ам Ватандин ЧIехи дяведин, адалай гуьгъуьнин йисарин четинвилериз дурум гайибурукай сад я. Ада хуьре юкьван школа куьтягьна. Диде-буба фад рагьметдиз фена. Адаз хушбахт жегьилвал акунач. Хуьруьнвийрихъ галаз гьуьрметлудаказ яшамиш жезвай, гьамиша гьар са касдиз алакьдай куьмекар гудай регьимлу бубадин тербия хци квадарнач. Адан гафунизни кардиз Желил Желилова вичин вири уьмуьрда вафалувал хвена. Бубадилай атай инсанвилин, зегьметдин, марифатдин, ахлакьдин тарсар ада вичин веледривни агакьарнава.
— Ватандин ЧIехи дяведин ва адалай гуьгъуьнин йисарин гзаф инсанрин кьадар-кьисмет агъурди хьана. Са бубат кIвачи чил кьур аялрини чIехибурухъ галаз колхоздин никIерани чуьллера кIвалахдай. Абур фан къадир аваз чIехи жезвай. А вахтарин вири четинвилер, азиятар, каш-мекь зазни акуна. Гьикьван четин тиртIани, чаз пакадин йикъахъ инанмишвал авай. Вирида гьакъисагъвилелди зегьмет чIугвазвай. Хуьруьн колхозда за тавур кIвалах амач. КIвенкIвечи лежбер яз, зун комсомолдин, ахпа партиядин жергейриз кьабулна. Махачкъалада советрин партшкола акьалтIарна. Закай Докъузпара райондин газетдин редакциядин жавабдар секретарь хьана, — рикIел хкизва агъсакъалди.
Гуьгъуьнлай (1960-1995-йисара) Желил Желилова почтадин отделдин начальниквилин, сберкассадин заведующийвилин везифаяр кьилиз акъудна. КIвалахдин вири йисара ада вич халис ватанперес, гьар са карда алакьдай куьмек, дуьз рехъ, меслят къалурдай инсан яз къалурна. Ада а вахтара хуьруьз посылкаяр, чарар, газетар гьисабна куьтягьиз тежедай кьванбур хкведайди рикIел хкизва. Вичин гьар йикъан зегьметдалди, везифайрив эгечIзавай тегьердалди агьалийрин арада Желил Желилова еке гьуьрмет къазанмишна. Адан шикил датIана Мегьарамдхуьруьн райондин гьуьрметдин доскада авай.
Ж.Желилов культурадин работникрин профсоюздин обкомдин гьуьрметдин грамотадиз, «Соцсоревнованидин гъалибчи» знакдиз лайихлу хьана. Вичин уьмуьрдин асирдин юбилей къаршиламишнавай Желил буба руьгьдиз кIубан я. Ам ачух рикI, дерин акьул авай камаллу инсан тирди гьасятда кьатIуз жеда. Ада тикрарзава: «Жува-жув къастуналди инанмишарун лазим я: заз йикъалай-къуз хъсан жезва. ДатIана и фикирдал алаз хьайила, ам гафаралди ачухарайла, бедендин сагъламвал хуьзвай къуватри тIазвай чка сагъариз куьмекда. Беден идара ийизвайди жуван къанажагъ я. Руьгьдал гуж акьалтзавай крарал гъалиб жез чир хьана кIанда. Сагъламвилин бинеда руьгьдин азадвал ава. Залан декьикьайра хъсан крар, регьят вахтар рикIел хкваш», — меслятзава агъсакъалди. И гафар ада вичин кайвани Ифризазни тикрардай (вичиз рагьмет хьурай, са шумуд йис адалай вилик, 83 йисан яшда аваз, ам рагьметдиз фена). Абурухъ 7 велед ава. Алай вахтунда 22 хтулди, 44 птулди чIехи бубадин рикI шадарзава. Абуру государстводин идарайра, промышленностдин карханайра, майишатра намуслувилелди кIвалахзава. Жаванри, жегьилри школайра ва вузра кIелзава. Желил бубадин патав чIехи хва Фетилан хизан гва. Хуьре руш Альбина яшамиш жезва. Каспийскда, Махачкъалада яшамиш жезвай веледрини чпин бубадин гуьгьуьл къачузва.
Мукьва-кьилийри Желил бубадиз ихьтин цIарар бахшнава:
Къе куь хизан, къарагъна фад,
Сивик хъвер кваз кIвачел ала.
РикIиз кIани Желил халу,
Ваз юбилей мубаракрай!
Гьар патахъай къвез тебрикар,
Мукьвабурни чирхчирар,
Шадвал ийиз, кIвачел ала.
Ваз юбилей мубаракрай!
Юбилей мубаракрай, хизанда хушбахтлувал, гьуьрмет ва берекат мадни артух хьурай, гьуьрметлу Желил буба!
Регина Семедова
