Дагъустандин халкьдин шаир СтIал Сулей­манан 155 йисан юбилейдиз гьазурвилер акунин мярекатра активвилелди иштирак авунай СтIал Сулейманан райондин биб­лиотекайрин центральный­ къу­рулушдин (ЦБС) художник-оформи­тель Лариса Рамазанова мергьяматлувилин «Умуд» фондунин патай Чухсагъулдин чарчиз ва пулдин пишкешдиз лайихлу хьана.

…Художник — им кьетIен пешекарвал я. Инсанрин суьретар, тIебиатдин гуьзел чкайрин шикилар чIугун, чепедикай, хъенчIикай кIалубар арадал гъун, парчадал гъаларалди нехишар атIун ва ихьтин маса алакьунар гьар кткай инсандихъ жедач. Ибур анжах чпихъ акьалтIай бажарагъ авайбурун тIем акакьдай крар я. Маса гафаралди лагьайтIа, бажарагъ шукур хьайи Халикьди инсандиз кьетIен пай яз гузва. Инал чаз вичикай ихтилат ийиз кIанзавай Лариса Борисовнадихъни гьахьтин пай, кьетIенвал ава.

Л.Рамазановадин (Мороз) ери-бине Ук­раи­надай я. Ам Полтавадин областдин са хуьре дидедиз хьана. Школа 1991-йисуз Пи­рятина шегьерда акьалтIарна. Ада ихтилат авурвал, гьеле школада кIелзавай йисара ам шикилар, суьретар чIугунал, чепе­дикай жуьреба-жуьре къапар, кIалубар аву­нал машгъул хьана. Гьавиляй школа­ акьалтIарай Лариса Пирятина шегьерда­ Гоголан тIварунихъ галай керамикадин тех­никумдик экечIна. Ина ада тежрибалу педагогрин-худож­никрин гъилик вичин рикI алай пешедай чирвилер ва тежриба къачуна, 1996-йисуз ада техникум акьалтIарна, вичин пешедай кIвалахна.

Кьисметди инсан, гару ягъай пеш хьиз, вичиз кIандай чкадиз акъудда. Лариса Борисовнани Дагъларин уьлкведиз, Агъа СтIалдал акъатна.

— Дагъустандиз, камаллу, мугьманперес лезги халкьдин арадиз аватунал зун кьадар авачир кьван шад я, — лугьузва Л.Рамазановади. — Захъ ина гьуьрметлу хизан хьанва, зун рикI алай пешедал машгъул я. Инсандиз бахтлу хьун патал мад вуч кIанда?

Лариса Борисовнади, чна винидихъ лагьайвал, 2000-йисалай райондин ЦБС-да художник-оформитель яз кIвалахзава. Ада кхьизвай плакатри, чIугвазвай суьретрини шикилри, стендри неинки центральный библиотекадин, гьакIни хуьрера кардик квай адан филиалрин къецел ва къене патар безетмишнава.

Алай йисуз районда СтIал Сулейманан 155 йис тамам хьунин мярекатар виниз тир дережада аваз тухуни Лариса Борисовнадин къайгъуяр артухарзава: ада ЦБС-дин хуьрера кардик квай филиалриз, ХХ асирдин Гомераз талукьарна, хейлин плакатар, стендар гьазурна. И кар давамарзава.

Л.Рамазановади 2023-йисалай райондин художественный школадани художник-педагог яз кIвалахзава, художниквилин сирер жаван гадайризни рушариз чирзава.

Адан гъилик суьретар ва шикилар чIугу­нин рекьяй вердишвилер къачузвай, художниквилин сирер чирзавай са шумуд аялди мукьвара СтIал Сулейманан яратмишунрай шикилар чIугунай районда тухвай конкурсда приздин чкаяр кьуна.

— Лариса Борисовнадин кIвалахдикай, пешекарвилин дережадикай хьиз, чавай адан инсанвилин ерийрикайни къилихрикай хуш келимаяр лугьуз жеда, — къейдзава ЦБС-дин директор Назиля Шихбабаевади. — Чи дуствилин коллективда хьиз, адаз хуьре-кIвалени еке гьуьрмет ава.

Лариса Борисовна пуд веледдин дидени я. Мадни шадвал кутадай кар ам я хьи, адан руш Эльвирадихъ, гада Абдулахъни шикилар чIугунин рекьяй алакьунар ава.

Хазран Кьасумов