Гафунин устадар хьиз, лезгийрихъ шикилар, суьретар чIугунин рекьяйни алакьунар авай пешекарар гзаф ава. Абурун жергедай чавай чпин яратмишунар дуьньядин майданрани машгьур хьанвайбурун тIварар кьаз жеда. Шикилар, суьретар чIугунин алакьунар авай жегьилрикай сад Азербайжанда яшамиш жезвай художник-карикатурист, график Мамедханова Рагьима Гьасановна я.
Ам 1979-йисан 27-июндиз КцIар райондин ТIигьиржалрин хуьре дидедиз хьана. Мектеб куьтягьайдалай кьулухъ ам АГАХ-дин (Азербайжандин государстводин художественный академия) графикадин отделенидик экечIна ва анаг яру дипломдалди акьалтIарна. Гуьгъуьнлай ина кьве йисуз магистратурадани кIелна.
2005-йисалай ам Азербайжандин художникрин союздин, 2006-йисалай Азербайжандин карикатуристрин кIватIалдин член я. 2006-йисалай ам аялрин “Пуд ич” тIвар алай журналдин художник-дизайнер яз кIвалахдив, 2010-йисалай художественный академиядин къвалав гвай искусстводин колледжда пешедин рекьяй тарсар гунив эгечIна.
Рагьима Мамедханова вири халкьарин карикатурайрин конкурсрин иштиракчи я. Яратмишунрал ам 1999-йисалай рикIивай машгъул я, ам вичин ватанда, къецепатан уьлквейра тешкилай хейлин выставкайрин призер я. Адан кIвалахрин чIехи пай хайи чилиз — КцIар райондиз талукь я.
Художниквиле ада гзаф кьадар чапханайрихъ галаз кIвалахзава. Идалайни гъейри, бажарагълу художникди ктабрин иллюстратор-дизайнер яз зегьмет чIугвазва, жуьреба-жуьре сайтар патал шикилар арадал гъизва. Ам аялар патал “АскIанди ва адан дустар” журнал арадал гъайибурукай сад я.
Бажарагълу художникди яратмишнавай бязи шикилрихъ галаз интернетда таниш жедай мумкинвал ава. Чаз адахъ мадни еке агалкьунар хьана кIанзава.
Куругъли Ферзалиев
