Фармацевтикадин илимрин кандидат, ПГНИУ-дин (Пермский государственный национальный исследовательский университет) инсандин экологиядин ва хатасузвилелди уьмуьр кьиле тухунин къайдайрин  кафедрадин доцент, биологиядин затIарин илимдинни ахтармишунрин лабораториядин заведующий, А.Фридманан тIварцIихъ галай медалдин сагьиб  Рамиз  Рагъибович  Магьмудов  алай вахтунда Пермь шегьерда сейли алимрикай сад я.

Рамиз Рагъибович СтIал Сулейманан райондин Агъа СтIалрин хуьряй я. Юкьван мектеб агалкьунралди­ куьтягьайдалай кьулухъ ам Астрахань шегьерда ме­дицинадин училищедик экечIна. Анаг куьтягьай 1980-йисуз ам Пермь шегьердиз куьч хьана ва ана университетдин химиядин факультетда кIелунар давамарна.­

РФ-дин Яракьлу Къуватрин жергейра къуллугъ кьилиз акъудна хтайдалай кьулухъ, алакьунар авай 2-курсунин студент яз, ам ПГНИУ-дин биологиядин ак­тивный затIарин лабораторияда кIвалахал акъвазна.

Са шумуд йисуз илимдал машгъул хьунин нетижада Рамиз Рагъибовича “Синтез и биологическая активность производных 4-замещённых 2,4-диоксо — бутановых кислот и гетероциклических соединений, полученных на их основе” темадай кандидатвилин диссертация (1998-йисуз) хвена.

РФ-дин илимдин лайихлу деятель, профессор, химиядин илимрин доктор Юрий Андрейчикован ва доцент,­ медицинадин илимрин кандидат Е.Пидэмскийдин регьбервилик кваз чи ватанэгьлиди гьайванрал илимдин сифте тежрибаяр тухвана. Лабораториядин жергедин къуллугъчи хьиз кIвалахдив эгечIай Рамиз Магьму­дов са куьруь вахтунда ПГНИУ-дин тIебии илимрин инс­ти­тут­дин илимдинни ахтармишунрин лабораториядин за­ведующий хьана. И къуллугъдал ада 2002-йисалай къе­далди агалкьунралди кIвалахзава. Химиядин ре­кьелди­­ талукь тир ахтармишунар тухвайдалай кьулухъ цIи­йиз­ арадал гъизвай дармандин бине Рамиз Рагъибо­ви­чан лабораторияда кутазва. Дарман арадал гъун патал вишералди, агъзурралди химиядин затIар ахтармишзава. Ахтармишунрин университетда ада 2 агъзурдалайни гзаф цIийи продуктрик биологиядин менфятлу затIар кватIа, ахтармишна. Ахтармишай материалрай ада авторвилин 5 шагьадатнама ва цIийи затI арадал гъун патал­ 16 патент къачуна. Р. Магьмудов илимдин 160-далайни гзаф макъалайрин ва монографийрин автор я.

2010-йисуз Рамиз Магьмудован илимдин кIвалах­риз еке къимет гана — адакай ПГНИУ-дин лап хъсан изоб­ретатель хьана. КIвалахдин юлдашрин ва студентрин арадани адаз еке гьуьрмет ава. Ада жуьреба-жуьре чешмейрин, СМИ-рин такьатрин куьмекдалди пешедин рекьяй хъсан теклифар гузва, мукьвал-мукьвал мярекатра иштиракзава. Чаз алим илимдин рекье мадни кьакьан кукIушрив агакьна кIанзава.

«Лезги газет»