Гьуьрметлу дагъустанвияр! 2017-йис экономикадин муракаб гьаларихъ ва тIебиатдинни гьавадин татугай шартIарихъ галаз алакъалуди хьанатIани, чи республика патал ам писди хьанач. Гьукуматдин кьетIен дикъетдик кваз республикадин хуьруьн майишатдин ва шей гьасилзавай министерстводин хилера гьалар хъсанвилихъ дегиш хьана. Хуьруьн майишатди гьасилнавай суьрсетдин кьадар 4,7 процентдин артух хьанва.

Чилел зегьмет чIугвазвайбур кьетIен ва баркаллу келимайриз лайихлу я. ГьикI лагьайтIа, малдаррин, лежберрин, магьсулдаррин, фермеррин, механизаторрин, багъманчийрин зегьметдин нетижаяр себеб яз, чи туьквенар ва базарар хъсан еридин недай-хъвадай шейэралди таъмин хьанва.

Тарихдиз хъфизвай 2017- йисуз чи министерстводи Москва шегьерда кьиле фейи Россиядин “Золотая осень-2017” агропромышленный выставкада иштиракна. Виниз тир еридин продукция гьасилуниз килигна, чун 56 медалдиз гьа жергедай яз къизилдин 41-даз лайихлу хьана.

Алай вахтунда “Гьукуматдин куьмек” программадин бинедаллаз набататар битмишарунин, багълар ва уьзуьмлухар кутунин, мал-къарадин кьадарар артухарунин, хуьруьн майишат вилик тухунин рекьяй Минсельхоздай куьмекдин такьатар чара ийизва. И программадин гьакъиндай ва къайдайрикай РД-дин Минсельхоздин сайтда ганва. Мукьвара РД-ди юкьван ва гъвечIи бизнесдал машгъул компанийриз куьмек гун патал “Гьукуматдин куьмек” программадай мад кьуд инвест-проект кардик кутазва.
2020-йисалди хуьруьн чкаяр вилик тухунин рекьяй программаярни кардик ква. 2018-йис хуьруьн майишатдин хиле зегьмет чIугвазвай ксар патал дигай мумкинвилеринди жедайдахъ чун умудлу я. И рекьяй хейлин проектар кардик акатда. Алукьзавай йисуз къуй Квехъ сагъламвал, гележегдиз ян тагана килигунин мягькемвал, зегьметда рикIер шадардай бегьерар, нетижаяр хьурай! Къуй куь кIвалера берекатди ва къулайвилери гегьенш чка кьурай!

РД-дин хуьруьн майишатдин ва суьрсетдин министрдин везифаяр вахтуналди тамамарзавай Керимхан Абасов