Россиядин Президент Владимир Путина жемиятдин ва мергьяматлувилин кIвалахрик кьетIен пай кутунай чи машгьур ватанэгьли Сулейман Керимован уьмуьрдин юлдаш Фируза Керимовадиз чухсагъул малумарнава. Фируза Керимовади яшайишдин жуьреба-жуьре хилера мергьяматлувилин проектар уьмуьрдиз кечирмишзавай ва куьмекар гузвай “Территория добра” фондуниз регьбервал гузва.
2017-йисуз фондуни кьилиз акъуднавай чIехи проектрик Дербент шегьердин 18-нумрадин гимназия цIийикIа туьхкIуьр хъувун ва 2016-йисуз цIай ягъунин нетижада еке зиянар хьайи Дагъустандин халкьдин шаир СтIал Сулейманан эдебиятдинни мемориалдин кIвал-музей арадал хкун акатзава.
Мадни башкъа, алай йисуз Москвадин областдин Одинцовский райондин Заречьеда авай юкьван мектебни цIийикIа туьхкIуьрна акьалтIарна. Санлай къачурла, и кIвалахриз 2,1 миллиард манат чара авунвай. Мектеб патал кинооборудование авай медениятдин махсус комплекс, медиатека, ктабхана, тIуьн недай кьве зал, алай аямдин вири истемишунар вилив хвена эцигнавай сирнавдай кьве гьавиз, керлингдал, хоккейдал, машгъул жедай махсус майдан эцигнава.
2016-йисуз ина муркIадилай авахьиз чирдай (фигурное катание) аялринни жаванрин спортдин Ирина Слуцкаядин тIварунихъ галай мектеб ачухнай. Мектеб цIийикIа туьхкIуьр хъувунин кIвалахра иштиракунай Подмосковьедин губернатор Андрей Воробьева Фируза Керимовадиз “Москвадин областдин вилик лайихлувилерай” пуд лагьай дережадин орден гана.
ЦIи Керимовадиз РД-дин гьуьрметдин “Хайи чил кIан хьунай” знакни вахкана.
Чи мухбир