Россиядин журналистрин Союздин член, милли газетдин мухбир, «Куьредин ярар» культурадин центрадин векил, «Гъетягърин булахар», «Гьижрандин лепе», «Хайи лувар», «Гъетягъар ва гъетягъвияр», «Цуьквер ва къалгъанар» ктабрин автор Вадим Жамалдинов чи газет кIелзавайбуруз фадлай малум кас я. Мукьвал-мукьвал газетдин чинриз акъатзавай макъалайралди, шикилралди, шиирралди. Ам вичин хатI авай мухбир, шаир я. И йикъара «Мавел» издательствода Жамалдинован «Хкягъай эсерар» ктаб чапдай акъатна.

«Ватандал рикI хьун», «Эхир, эвел авачир дуьнья», «Поэмаяр», «Маналу шиирар», «ТIебиат ва инсан», «Гьуьрметлу дус­тариз», «Манияр — зи рикIин лувар», «Муьгьуьббатдин ялавар», «Девирдин къайивилер» паярикай ибарат ктабда 60 йисан девирда къелемдикай хкатнавай квайни квай пуд вишелай виниз шиирар ва вад поэма гьатнава.

В. Жамалдинован эсеррай чаз девирдин ачух ва жуьреба-жуьре рангари кьунвай чин аквазва. Неинки кIвале, районда, уьлкведа ва гьакI дуьньядани кьиле физвай бязи татугай вакъиайри, гьалари, инсанрин къалп рафтарвилери шаирдин рикIик секинсузвал кутазва, гагь ам лап ажугъламишзава. Гьа са вахтунда хсуси дердерихъ галаз сад хьиз, ада халкьдин месэлайрикайни дердерикай кхьизва.

Нариман Ибрагьимов