Къастунин гъалибвал

СтIал Сулейманан райондин адми­нистрациядин пресс-къуллугъди хабар гузвайвал, Имам Абдулгьа­ли­мовакай женгинин искусствойрин адетдин жуьрейрай дуьньядин халкьарин Къугъунрин чемпион хьанва.

Акъажунар мукьвара­ Марий Эл республикадин меркез Йошкар-Ола ше­гьерда кьиле фена. Ана Россиядин 54 региондай ва са жерге къецепатан уьлквейрай 2000-далай виниз спортсменри иштиракна.

СтIал Сулейманан райондай тир И. Абдулгьали­мова «NoGi» лишандик квай дисциплинадай 75 ки­лограмдин заланвилин категориядай вичин алакьунар къалурна. Къастунал кIевивили адаз кесерлу акъажунра ­къизилдин медаль къачудай мумкинвал гана.

С.Меликова мубаракна

3-августдиз Арабрин Сад хьанвай Эмиратрин меркез Абу-Даби шегьерда UFC-дин нубатдин турнир кьиле­ фена. Акъажунра дагъустанви са шумуд спортсменди чемпионвилин тIварар къачуна. Дуьньядин дережадин турнирда гъалиб хьун абуруз Дагъустандин Кьил Сергей Меликова мубаракна.

Гъалибчийрикай сад Умар Нурмегьамедов я. Ада турнирдин кьилин бягьс Америкадай тир Кори Сэндхагенахъ галаз тухвана ва судьяйрин къарардалди, чемпиондин тIварцIиз дагъустанви лайихлу хьана. Къейд ийин хьи, У. Нурмегьамедов спортдин рекье гила 18-сеферда гъалиб хьанва ва ам садрани кумукьнавач.

Шарабутдин Мегьамедова Польшадай тир Михаил Олексейчуказ бягьсина вилик экечIдай са мумкинвални тунач. Спортдин экспертри къейд авурвал, абурун бягьс тамашачийрин рикIел геждалди аламукьда.

Бахрейндин патай экъечIай мад са дагъустанви спортсмендиз – Шамил Гъазиеваз — турнирда американви Дон’Тэйлу Майесу кумукьна.

«Мубаракрай, гадаяр! Чна квел дамахзава ва идалай кьулухъ куьне генани кьакьан кукIушар муьтIуьгъардайдак еке умудар кутазва», — кхьена Сергей Меликова вичин телеграм-каналда.

7-сеферда

10-августдиз Кьурагьрин хуьре ирид лагьай сеферда «Кьурагьрин къугъунар» лишандик кваз спортдин милли жуьрейрай республикадин дережада аваз акъажунар кьиле фида.

ЦIи турнирда Дагъустандин жуьре­ба-жуьре районрайни муниципалитетрай са шумуд виш спортсменди иштиракун ­вилив хуьзва. Абуру чIемерукрай ягъунай, чукурунай, чене акъуднай, цIил ялунай, армспортдай чпин къуватар ахтармишда.

Гъалибчийриз дипломар, пулдин пиш­кешар ва багьа савкьатар гуда. Акъа­жунра ашкъи авай гьар са спортсмендивай иштиракиз жеда.

Чи  мухбир