Россиядин халкьарин Садвилин йикъан сергьятра аваз алатай гьафтеда Мегьарамдхуьре Советрин Союздин Игит Абас Исрафилован экуь къаматдиз бахшна 2009-2010 ва 2011-2012-йисара дидедиз хьайи жаванрин арада азаддаказ кьуршахар кьунай республикадин акъажунар кьиле тухвана. Ана Дагъустандин 22 райондай ва шегьеррай тир 300 спортсменди гьасиррал чпин устадвал къалурна.
Турнир ачухуниз талукьарнавай шад мярекатдал райондин кьил Фарид Агьмедова спортдиз артух фикир, бажарагъ авай спортсменриз вири патарихъай куьмекар гузвайди ва абуруни, чпин нубатдай яз, гъвечIи Ватан машгьурзавайди къейдна. И серенжемдин тешкилатчийрикай сад тир РД-дин физический культурадин ва спортдин министерстводиз сагърай лагьана. Турнирдин сергьятра аваз Фарид Агьмедова ва райондин патай Дагъустандин Халкьдин Собранидин депутат Мусафенди Велимурадова Украинада кьиле физвай дяведин махсус серенжемда жуьрэтлувал къалурунай алай вахтунда отпускдиз хтанвай са шумуд касдив Мегьарамдхуьруьн райондин гьуьрметдин грамотаяр вахкана. РД-дин физический культура ва спорт вилик тухуник лайихлу пай кутунай министерстводин патай и хиле тафаватлу хьайи са шумуд къуллугъчини грамотаяр гуналди къейдна.
***
И йикъара Астраханда «Жуьрэтлувиляй» кьве ордендин, краповый беретдин сагьиб, Росгвардиядин Махачкъалада кардик квай военный частунин къуллугъчи, майор, Украинада кьиле физвай дяведин махсус серенжемда телеф хьайи Руслан Примован экуь къаматдиз бахшна кикбоксингдай ачух турнир кьиле тухвана. Адан тешкилатчи «Кикбоксингдин Академия» клуб ва Р. Примовахъ галаз санал кIвалахай кIеви дуст, Росгвардиядин подполковник Ярослав Гетманский тир. Турнирдин багьа мугьманрин жергеда Руслан Примован дидени буба ва санал кIвалахай юлдашар авай.
Акъажунра Астрахандин ва Волгограддин областрай, гьакIни Калмыкиядай тир 13 клубда чпин устадвал хкажзавай 200-далай виниз жуьреба-жуьре яшарин спортсменри иштиракна. КIвенкIвечи чкаяр кьурбур медалар, кубокар, грамотаяр ва рикIел аламукьдай пишкешар гуналди къейдна.
Руслан Примован диде-бубади – Жамалдин Примова ва Аида Къарахановади — турнир тешкилайбурузни иштиракайбуруз, чпин телеф хьайи хцин экуь къамат рикIера хуьзвай виридаз сагърай лагьана.
Турнирдин сергьятра аваз Руслан Примован кIвалахдин рекьяй юлдашри спортсменар ва мугьманар патал махсус техникадин ва яракьдин выставкани ачухнавай.
***
4-5-ноябрдиз Махачкъалада, Дагъустандин волейболдин центрада, спортдин журналист Мегьамед Канаеван экуь къаматдиз бахшна РД-дин физический культурадин ва спортдин министерстводи гребный спортдай республикадин чемпионат кьиле тухвана. Ана Дагъустандин жуьреба-жуьре пипIерай тир 100-лай виниз спортсменри иштиракна.
Чемпионатда вичин ери-бине Мегьарамдхуьруьн райондай тир, физкультурадинни спортдин инвалидрин «ДаКИ» клубдин член Ибрагьим Бегова («Гребля-индор» дисциплинадай) гъалибвал къазанмишна.
Спортдал активнидаказ машгъул жезвай адахъ агалкьунар мадни ава. Ам гьакIни Мегьарамдхуьруьн райондин кьилин общественный куьмекчи, РД-дин коляскайра аваз баскетбол къугъвадайбурун хкянавай командадин капитан я.
Рагнеда Рамалданова
