РД-дин Кьил Сергей Меликован алай йисан 14-январдин 5-нумрадин указдалди Азербайжандин меркез Баку шегьерда Дагъустан Республикадин Векил яз Абдуллаев Алияр Танрыверди-огълы тайинарнава. Идакай «Лезги газетдиз» РД-дин Кьилин пресс-къуллугъди хабар гана.
Къейд ийин хьи, виликдай и къуллугъдал Марат Аскендеров (ам РД-дин Халкьдин Собранидин Председатель Заур Аскендерован стха я) алай. Ада Векил яз 2014-йисалай кIвалахзавай. Къуллугъдилай вичин хушуналди элячIна.
РикIел хкин, 2023-йисан майдин вацра Сергей Меликова Баку шегьерда авай Дагъустандин Векилхана гьукумдин кьилдин органдиз элкъуьрнай.
ЦIийиз тайинарнавай Алияр Абдуллаевакай ачух чешмейра са акьван гзаф малуматар авач. Республикадин бязи СМИ-рин делилралди, миллетдал гьалтайла ам азербайжанви я. Адахъ генерал-майордин чин ава. 2016-2023-йисара А.Абдуллаева Росгвардиядин Приволжский округда авай кьушунриз регьбервал гузвайдан заместитель яз кIвалахна. Адахъ гьакIни илимдин дережани ава: 2006-йисуз А.Абдуллаева уьлкведин МВД-дин къенепатан кьушунра къуллугъзавайбуруз ватанпересвилин тербия гунин месэлайрай педагогикадин илимрин кандидатвилин диссертация хвена.
Агьмед Магьмудов
