18-20-ноябрдиз Мегьарамдхуьруьн районда азаддиз кьуршахар кьунай СССР-дин Игит А.Исрафилован ва Украинада кьи­ле физвай махсус серенжемда телеф хьайи къуллугъчийрин экуь къаматриз бахшнавай турнир кьиле фена. Идакай “Лезги га­зетдиз” муниципалитетдин администрациядин пресс-къуллугъди хабар гана.

Республикадин дережада аваз тешкилнавай акъажунар, сифте гаф рахуналди, райондин кьил Фарид Агьмедова ачухна. Теклифнавай мугьманрин арада Белиж поселокдин администрациядин кьил Рамиз Гьабибуллаев, тренерар, спортсменар, Мегьарамдхуьруьн райондин идарайрин векилар, дяведин рекьяй къуллугъзавайбур ва масабур авай.

“И турнир районда кьиле тухуз са шумуд йис я, амма цIи ам сифте яз Украинада­ кьиле физвай махсус серенжемда телеф хьайибур­ун экуь къаматриз бахшна тешкилнава. Телеф хьайибурни, алай вахтунда­ кье­гьалвилелди серенжемда иштиракзавайбурни — вири чIехи гьуьрметдиз лайихлу игитар я. Са шакни ала­чиз, чна абуруз ви­ри рекьерай куьмекар гун давамарда.

Заз турнирдиз атанвайбуруз виридаз сагърай лугьуз кIанзава!” — лагьана Ф.Агь­ме­до­ва мугьманар тебрикдайла. Турнирдин сергьятра аваз, Мегьа­рамдхуьруьн райондай махсус серенжемда иштиракзавай са шумуд аскердив муниципалитетдин кьили женгера викIегьвилер къалурунай гьуьрметдин грамотаяр вахкана.

Гуьгъуьнлай рахай Р.Гьабибуллаева гьар йисуз, Абас Исрафилован экуь къаматдиз талукьарна, республикадин дережада аваз азаддиз кьур­­шахар кьунай акъажунар тешкилзавай Мегьарамдхуьруьн райондин кьилевайбуруз сагърай лагьана. Ада къейд авурвал, и турнирдихъ неинки са спорт вилик тухунин, гьакIни жегьилриз ватанпересвилин тербия гунин метлебни ава.

Турнирда Мегьарамдхуьруьн, СтIал Сулейманан, Хив, Ахцегь, Дербент, Хасавюрт ва са жерге маса районрин командайри иштиракна. Гъалиб хьайибур дипломриз, кубокриз, медалриз, багьа савкьат­риз лайиху хьана.

Чи мухбир