Алатай гьафтеда Махачкъалада, “Дагъустан” РИА-да кьиле фейи конференциядал РД-дин зегьметдин ва яшайишдин рекьяй вилик финин министрдин заместитель Абдулкерим Абдулаевани Украинада кьиле физвай махсус серенжемда иштиракзавайбурун ва телеф хьайибурун хизанриз куьмекар гун патал республикада арадал гъанвай “Все вместе” фондунин директор Селимхан Мирзеханова фондуни кьиле тухванвай кIвалахрин нетижаяр кьуна.
РикIел хкин, ихтилат физвай фонд РД-дин Кьил Сергей Меликован теклифдалди арадал гъанва. Ам кардик акатай йикъалай инихъ серенжемда иштиракзавай 2300 дагъустанвидин хизанриз 100 агъзур манатдин кьадарда пулдин куьмекар ганва.
С.Мирзеханова хабар гайивал, фондунин кIвалахдин сергьятра аваз серенжемдин иштиракчийрин хизанриз жуьреба-жуьре рекьерай куьмекар гузва. Мисал яз, РД-дин зегьметдин ва яшайишдин рекьяй вилик финин министерстводин векилрин куьмекдалди Дербент районда 10 иштиракчидин аялар ясли-бахчайриз рекье туна. РД-дин Халкьдин Собранидин депутат Сефер Алиева кьил кутуналди, са шумуд депутатди фондуниз 500 агъзур манатдин кьадарда аваз пулдин такьатар чара авунва.
Ада гьакIни къейд авурвал, фондуниз РД-дин гьукуматдин резервдин фондунай — 150, меценатрин, гьар жуьредин идарайрин патай, санлай къачурла, 200 миллион манат пул агакьнава.
Агьмед Магьмудов
