18-20-ноябрдиз Минскда грекринни римлуйрин жуьреда кьуршахар кьунай акъажунар кьиле фена. Олимпиададин къугъунрин гъалибчи Олег Караваеван экуь къаматдиз талукьарнавай международный турнир цIи 29-сеферда тешкилнавай.
Акъажунрин сергьятра аваз вишералди спортсменри чпин алакьунар къалурна. Шад жедай кар ам я хьи, чи ватанэгьли Анвар Аллагьярова 60 килограммдин заланвал авайбурун арада вич виридалайни викIегь тирди тестикьарна. Адакай турнирдин чемпион хьана.
Къейд ийин хьи, и акъажунра мад са ватанэгьлиди иштиракна: Шуай Мамедов буьруьнждин медалдин сагьиб хьана.
«Лезги газет»
