27-мартдиз Махачкъала шегьерда авай военный частуна Игитриз аллея ачухай мярекатда РД-дин Кьил Сергей Меликовани иштиракна. И мярекат оперативный метлеб авай 102 лагьай  кьилдин бригададин махсус серенжемда телеф хьайи аскерар ри­кIел хуьниз талукьарнавай.

Памятник подполковникар тир Шамил Ахкубегова ва Мурадхан Агьмедханова ачухна. Махсус серенжемда абуру сифте йикъа­лай иштиракзава.

Региондин Кьили аскерриз пешекарвилин сувар тебрикна, 102-бригадади 30 йи­салай виниз Кеферпатан Кавказда къуллугъдин везифаяр уьтквемвилелди кьилиз акъуд­завайдакай лагьана.

Махсус серенжемда иштиракзавай кьилдин бригададин 400-ев агакьна ас­керар, офицерар государстводин шабагьралди къейднава.  Абурукай капитан Мегьамед Гьа­бибов, подполковник Шамил Кябишев, ефрейтор Рустам Мегьамедов, капитан Иван Судаков, старший сержант Вадим Шихов ва масабур кьетIендиз тафаватлу хьана.

“Уьлкведин регьберри куь, милли гвардиядин кьушунрин, жуьрэтлувилиз, дирибашвилиз еке къимет гун шадвалдай кар я. Чнани квез гьар са месэла гьялиз куьмек гуда, четин вахтунда куьн кьилди тадач. Им сифте­ нубатда телеф хьайибур авай хизанриз ­та­лукь я. Чир хьухь, чи патай квев гьамиша ге­­­рек куьмек агакьда”, — лагьана Сергей Ме­ликова­.

Алай вахтунда кьушунра къуллугъзавайбурузни Дагъустандин Кьили цIийи агалкьунар ва гъалибвилер, сагъ-саламатдиз кIва­лиз хтун алхишна.

Росгвардиядин Махачкъаладин соединенидин командир, генерал-майор Дмитрий Чес­тякова лагьайвал, 102-бригададин аскерри Ук­раинадин миллетбазрикай са шумуд хуьр азад­на.

РФ-дин Госдумадин депутат, генерал-майор Абдулгьаким Гьажиева Игитрин аллея ачуху­ник вичин пайни кутуна. Мярекатдал адан куьмекчи  Расул Хайбуллаева аскерар тебрикна.

Военный серенжемда телеф хьайи аскердин буба Мукаил Исмаилова хизандин гьакъин­дай къайгъу чIугунай Сергей Меликоваз ва во­ен­ный частунин кьилевайбуруз сагърай ла­гьана: “Къе чун гъавурда акьазва, чи багърийри­ чпин уьмуьр гьавайда пучнавач. Чна абу­рал­ ва Игитар рикIелай ракъур тийизвай чи го­су­дар­ст­водал дамахзава. Чна частунин кьи­ле­вай­бурузни, республикадин регьбердизни сагърай лугьузва. Чав абурун патай гьар жуьредин куь­мек агакьзава. Им чун патал метлеблу кар я”.

Махачкъалада дагъустанвияр тир Игитриз талукьарнавай мад са аллея арадал атана. “Ак-Гёль” паркуна Росгвардиядин Махачкъаладин управленидин къуллугъчийри 50 къелем акIурна.

Чи мухбир