СтIал Сулейманан райондин, хуьрерин администрацийрин ва культурадин идарайрин къуллугъчияр дяведин махсус серенжемда кьегьалвилер къалурзавай рухвайрихъ галаз гуьруьшмиш жезва.
Герейханован хуьруьн администрациядин кьил Руслан Алдырова Радик Къазиев хушвилелди кьабулна, адахъ галаз армияда къуллугъзавай ва махсус серенжемда иштиракзавай районэгьлийри женгера къалурзавай кьегьалвилерикай суьгьбетар авуна. Ада къейд авурвал, гьукумдин органри аскеррин хизанриз вири жуьредин куьмекар гузва.
ДаркIуш-Къазмайрин хуьре Суворован орден авай Бахтияр Межведиловахъ галаз гуьруьш кьиле фена. Ада вич дяведин махсус серенжемдиз гьикI акъатнатIа, гьадакай ихтилатна.
— Украинадин миллетбазрихъ галаз тухузвай дяведин серенжемда зи кьве хци иштиракзавай. Завайни кIвале акъвазиз хьанач. РФ-дин оборонадин министерстводихъ галаз икьрар кутIунна, зунни Ватандин итижар хуьн патал фена. Нубатдин женгина зал хер хьана, гила сагъламвал мягькем хъхьайла, жува къуллугъзавай частуниз хъфида, — лагьана Б.Межведилова.
Зизикрин хуьруьн культурадин кIвалин къуллугъчияр хер хьайидалай гуьгъуьниз отпускдиз хтанвай Низами Селимовал кьил чIугваз фена. Аскердин диде-бубади культурадин къуллугъчияр хушвилелди кьабулна ва чпин хцикай ихтилатна. Низамидиз гъвечIи чIавалай аскер, офицер жез кIанзавай. Ингье ада армияда къуллугъзава.
Низамиди мугьманриз Донбассдин чилер миллетбазрикай азадзавай серенжемрикай ва вичин юлдашрикай суьгьбетна.
РикIера хуьда
Ахцегь райондин Смугъулрин хуьре дяведин махсус серенжемда иштиракзавай кьегьалрин шикилар, тIварар алай баннерар эцигна.
Старший лейтенант Аваз Агъакишиев 2023-йисан январдиз Донецкдин Республикадин Новодаровка хуьруьн патав кьиле фейи женгина телеф хьана. Адан анжах 26 йис тир. ВикIегь офицердиз (кьейидалай кьулухъ) «Жуьрэтлувиляй» орден гана.
Имийрин рухваяр тир МутIалиб ва Рагьим Исакьоври дяведин махсус серенжемда сифте йикъарилай иштиракзава, чеб дирибашдаказ тухузва.
Кьилди баннердал Ватандин итижар хуьз фенвай 26 смугъулвидин тIварар кхьенва.
Смугъулрин хуьруьн администрациядин кьил Аслан Мегьдиева лагьайвал, мукьвара Ватандин вилик вичин буржи уьтквемвилелди тамамарай лейтенант Юсиф Гьажиеваз талукьарнавай баннерни эцигда.
Президент Владимир Путина малумарайвал, СВО-дин иштиракчийрикай вири уьлкведиз чир хьун лазим я.
Мергьяматлувал
Мегьарамдхуьруьн райондай дяведин махсус серенжемда иштиракзавайбуруз нубатдин куьмек рекье туна.
Украинадин миллетбазрикай Донбассдин шегьерар, районар азадзавай женгина викIегьвилелди телеф хьайи майор Руслан Примован диде, «Ватан хуьзвайбур» госфондунин Дагъустандин филиалдин яшайишдин координатор Айида Къарахановади СВО-дин зонада къуллугъзавай аскерриз мергьяматлувилин нубатдин куьмек рекье туна. Ам Руслан Примов командир тир спецназдин 40 лагьай дестедин аскеррив агакьда.
Айида Къарахановади хабар гайивал, «Ватан хуьзвайбур» госфондунин ва Мегьарамдхуьруьн райондин патай рекье тунвай мергьяматлувилин куьмек ада Ватандин итижар хуьзвай аскеррив агакьарна ва абуруз сагърай лагьана. Чпин нубатдай, аскерри СВО-дин иштиракчийриз датIана куьмек гузвай фондуниз ва райондиз сагърай лагьана.
РД-дин Кьил Сергей Меликован регьбервилик кваз Дагъустандай СВО-диз датIана куьмек рекье твазва. И жигьетдай республика вилик жергейра ава.
Айида Къарахановади женгчи аскерриз мергьяматлувилин «Хъсанвал ая» дестеди рекье тунвай куьмекни тухванвай.
Хийир Эмиров
