Дербент райондин Белиж поселокдин сад, пуд лагьай СОШ-ра ва Г. Лезгинцеван тIварцIихъ галай ООШ-да, Украинада кьиле физвай махсус серенжемда телеф хьайи белижэгьлияр тир Рауль Дадашеваз, лейтенант Рамазан Омароваз ва старший сержант Альберт Гьажиметоваз мемориалдин кьулар ачухуниз талукьарна, ясдин митингар кьиле фена.
Къалурай дирибашвиляй, викIегьвиляй РФ-дин Президентдин Указдалди прапорщик Рауль Дадашеваз, лейтенант Рамазан Омароваз ва старший сержант Альберт Гьажиметоваз (кьейидалай кьулухъ) “Жуьрэтлувиляй” орденар ганва.
Митингра телеф хьайи игит аскеррин ва офицердин диде-бубайри, Дербент райондин кьил Мавсум Рагьимова, райондин управленийрин ва отделрин руководителри, школайрин директорри, общественный тешкилатрин векилри, агьалийри ва школьникри иштиракна.
“Гьихьтин гафар лагьайтIани, диде-бубайриз абуру сабурар гудач, рикIевай тIал акъатдач. Женгера телеф хьайи чи викIегь рухваяр игитар я. Абур тербияламишнавай диде-бубайриз чна, кьил агъузна, икрамзава. Куь дерт чна квехъ галаз пайзава, чун квехъ гала. Яшайишдин рекьяй квез вири патарихъай куьмекар гуз чун гьазур я”, — лагьана вичин рахунра М. Рагьимова. Аскеррин багърийриз ада, дериндай хажалат чIугуналди, башсагълувал гана.
Са декьикьада кисна акъвазна, ахпа мемориалдин кьуларал цуькверин кIунчIар эцигна.
* **
3-майдиз Хив райондин ЦIийи Фригъ хуьруьн спортшколадин цлал Украинада кьиле физвай махсус серенжемда телеф хьайи игит хва Эмин Тагьирович Нурадиноваз, мемориалдин кьул ачухуналди, адан тIвар эбеди авуна.
Махсус серенжемда къалурай дирибашвиляй, викIегьвиляй РФ-дин Президентдин Указдалди аскер Эмин Нурадиноваз кьейидалай кьулухъ “Жуьрэтлувиляй” орден ганва.
Ясдин митингда аскердин стха Жамбулат Нурадинова, Хив райондин кьил Ярмет Ярметова, Дербент райондин кьил Мавсум Рагьимова, общественный тешкилатрин векилри, агьалийри ва школьникри иштиракна.
— Игитвилиз вири девирра чка авайди я. Жуьрэтлувал хьун дуьшуьшдин кар туш. Эмин Нурадинов махсус серенжемда иштиракиз гуьгьуьллудаказ фена. Аскервилин буржи тамамардайла, игит хьиз телеф хьана. Адан тIвар чи рикIера гьамишалугъ амукьун патал чна чалай аслу тир вири кIвалахар ийида, — лагьана Я. Ярметова.
Са декьикьада кисна акъвазайдалай гуьгъуьниз мемориалдин кьул ачухна, анал цуькверин кIунчIар эцигна.
Къагьриман Ибрагьимов
