Дербент

ЧIехи Гъалибвилин 78 йис тамам хьуниз талукьарнавай сувар  аскерар кучукнавай стхавилин сурара кьиле фена. Шадвилин митингда шегьердин кьил Рустамбег Пирмегьамедова,  собранидин председатель Гьасан Мирзоева, Россиядин ФСБ-дин Дагъустанда авай Дербент шегьердин погранкъуллугъдин управленидин начальник, полковник Владимир Жуковскийди, ветеранри, депутатри, далу патан зегьметчийри, динрин ва общественный тешкилатрин векилри, къадим шегьердин агьалийри иштиракна.

“Гьуьрметлу дербентвияр ва мугьманар, 78 йис­ вилик чи бубайри ва ата-бубайри, гзаф  ивияр экъич­на, неинки чи багъри Ватан, гьакIни вири алем фашизмдикай азадна. Ватандин ЧIехи дя­веда Гъалибвал къазанмишунин сувар за квез ри­кIин сидкьидай мубаракзава. Къе чна фашистрихъ галаз женг тухвай, миллионралди чанар къурбанд авур чи гъалибчи-халкьдин кьегьалвилер ри­кIел хкизва. Бубайрин баркаллу крар давамариз, СВО-да иштиракзавай чи игитриз баркалла!” — лагьана  шегьердин кьили, иштиракчийрихъ элкъвена.

“Чи гъалибвал неинки тарих ва милли дамахдин ярж я, гьакIни ам чи вири халкьдин садвал къалурзавай чешне я”, — къейдна гуьгъуьнлай рахай В. Жуковскийди.

Митинг кьиле физвай арада машгьур хьанвай “Встанем”, “Гъалибвилин югъ” ва маса манияр лагьана, Ватандин ЧIехи дяведа ва СВО-да телеф хьайи игитар рикIел хуьниз талукьарнавай салют ахъайна.

Нянихъ шегьердин гьуьлуьн къерехда суварин концерт гана.

Белиж

Поселокдин малум тушир аскердин памятникдин къвалав гвай майдандал Чlехи Гъалибвилин 78 йис тамам хьуниз талукьарнавай сувар шад гьалара къейдна.

Памятник алай майдан кьуд патахъай суварик  иштиракиз атанвай, гъилера пайдахар, шарар,­ цуьквер ва плакатар авай школайрин ва “Отег”” фирмадин зегьметдин коллективрин, санлай къачурла, саки пуд агъзурдалай виниз инсанрай ацlан­ва. Гзафбурун гъилера чпин бубайрин, ата-бу­байрин, СВО-да телеф хьайи игитрин суьретар авай.

Ана Белиж поселокдин кьил Рамиз Гьабибулаева, Белиждин  погранкъуллугъдин подразделенидин командир Евгений Ляхова, собранидин председатель Несредин Ахундова, меценат Ферзиллагь Исламова, поселокдин школайрин директорри, Дербент райондин ва поселокдин собранийрин депутатри, агьалийри иштиракна.

Кlватl хьанвайбуруз Р. Гьабибулаева, Е.Ляхова, Н.Ахундова, Ф. Исламова, райондин собранидин депутат, сад лагьай школадин директор Имара Заловади ва масабуру Чlехи Гъалибвилин сувар тебрикна.

Школайрин художественный самодеятель­ност­дин жаван артистри ватанпересвилиз талукьарнавай манияр лагьана.

Къагьриман Ибрагьимов

Кьасумхуьр

СтIал Сулейманан райондин Гъалибвилин  комплекс-обелискдал митинг кьиле фена. Район­дин кьил Саид Темирханова, депутатрин собрани­дин председатель Штибег Мегьамедханова, райадминистрациядин кьилин сад лагьай заместитель Лацис Оружева, общественный палатадин председатель Алимет Мейланова ва жавабдар маса ксари памятникдал цуьквер эцигна. С.Темир­ханова кIватI хьанвай махлукьатдиз сувар мубаракна.

Дяведин йисара советрин халкьди, уьлкведин Яракьлу Къуватри къалурай кьегьалвилерикай, гъалибвал къачуник пай кутур районэгьлийрикай, алай вахтунда махсус серенжемда иштиракзавай райондин агьалийрикай СтIал Сулейманан ва Кьурагь районрин военный комиссар Рейзудин Женетова метлеблу рахунар авуна.

Гъалибвилин суварин митингдал гьакIни ЦIийи поселокдин юкьван школадин 11-классдин ученица Алина Мирзоева, махсус серенжемдин иштиракчияр тир Росгвардиядин сержант Славик Бабаев ва Вадим Мирзоев рахана.

Гуьгъуьнлай манидарри, музыкальный школадин ва аялрин яратмишунрин кIвалин тербиячийри концерт гана.

Хазран Кьасумов