15-сентябрдиз Дагъустандин халкьари Садвилин югъ — сувар къейдна. Чи халкьди, неинки Дагъустанда, гьакI патарал фейилани, маса республикайрани халкьарин садвал, чIалар, адетар, меденият, эдебият хуьниз, амай вири миллетрихъ галаз стхавилин алакъаяр мягькемаруниз еке фикир гузва.
1989-йисуз ЦIийи Узенда хьайи вакъиаяр фикирда кьуна, 1990-йисуз Шевченко (алай вахтунда Актау) шегьерда Дагъустандай фенвай лезги стхайри, чпин вилик акъвазнавай четин месэлайриз дурум гун патал, кьиле ихтибарлу, нуфуз авай ксар акъвазарна 1991-йисан мартдин вацра “Садвал” тIвар алай тешкилат арадал гъана.
Чи йикъарин машгьур юрист, виликан “афгъанви”, бажарагълу писатель Абил Абдурагьманович Межидов и кар патал сифте теклиф гайиди, адан председателдин заместителрикайни сад я. СССР чкIайдалай кьулухъ, 1992-йисан эхирдай, Абил Дагъустандиз хтана, амма цIуд йисан къене кIвалахай Къазахстандихъ галаз ада къени дуствилин алакъаяр хуьзва.
1996-йисуз тIвар дегишарна, лезгийрин тешкилатдал “Самур” эцигнатIани, везифаяр, кьилин фикирар гьа виликдай хьиз я: вири миллетрихъ галаз дуствилин, стхавилин алакъаяр хуьзва.
Алай вахтунда тешкилатдин председатель Селимов Гьажимегьамед я. Дагъустандин халкьарин Садвилин юкъуз ам чи республикадин руководстводин теклифдалди, мугьман яз, суварик хтанвай. Гьа и юкъуз Дербент шегьерда мугьманди Дагъустандинни Къазахстандин халкьарин стхавилин алакъаяр мягькемарунин карда лайихлувилерай “ЭКО Самур” тешкилатдин 25 йисан юбилейдин медаль Абил Межидовав вахкана. Абила вичин патайни Актауда яшамиш жезвай дагъустанвийриз ва къазах стхайриз лезгидал ва урусдал акъатнавай вичин “Кьве дидедин хва” ктабар рекье хтуна…
Мерд Али
